තරුණයන්ට රැකියා සහ ජනතාවට සහන අයවැයේ නැති බව එජාප සභාපති කියයි
වත්මන් රජයේ 2027 අයවැය මඟින් රට මුහුණ දෙන ප්‍රධාන ආර්ථික අභියෝගයන්ට විසඳුම් ලබාදීමට හෝ මහජනතාවට අර්ථවත් සහනයක් සැලසීමට අපොහොසත් වී ඇති බවට එක්සත් ජාතික පක්ෂ (UNP) සභාපති සහ හිටපු අමාත්‍ය වජිර අබේවර්ධන මහතා චෝදනා කර තිබේ.
කොළඹ මල් පාරේ පිහිටි එක්සත් ජාතික පක්ෂ දේශපාලන කාර්යාලයේදී අදහස් දක්වමින් අබේවර්ධන මහතා ප්‍රකාශ කළේ, විශේෂයෙන්ම ‘මිලේනියල්’ (Millennials) සහ ‘Gen Z’ යන තරුණ පරපුරේ අනාගතය සුරක්ෂිත කිරීම සඳහා කිසිදු ඵලදායී යෝජනාවක් මෙවර අයවැයට ඇතුළත් කර නොමැති බවයි. ලෝකය තාක්ෂණය හරහා වේගයෙන් ඉදිරියට ගමන් කරන මොහොතක ශ්‍රී ලංකාව තවමත් පසුගාමී මට්ටමක පවතින බවත්, තරුණ පරපුරට තාක්ෂණය පදනම් කරගත් රැකියා අවස්ථා බිහිකිරීමට ප්‍රමාණවත් වැඩපිළිවෙළක් ඉදිරිපත් කර නොමැති බවත් ඔහු පෙන්වා දුන්නේය.
2028 විදේශ ණය ගෙවීම පිළිබඳව ප්‍රශ්න කරයි
ශ්‍රී ලංකාවේ ඉදිරි විදේශ ණය ආපසු ගෙවීමේ වගකීම් පිළිබඳවද කනස්සල්ල පළ කළ හිටපු අමාත්‍යවරයා කියා සිටියේ, 2028 වසර වන විට මෙරට විදේශ විනිමය සංචිතය අමෙරිකානු ඩොලර් බිලියන 13 දක්වා ඉහළ නැංවිය යුතු බවයි. එමෙන්ම 2028 වන විට ජාත්‍යන්තර ආයතන වෙත අමෙරිකානු ඩොලර් බිලියන 3.5 සිට බිලියන 4 දක්වා වූ ණය වාරික ගෙවීමට සිදුවන නමුත්, එම මුදල් සපයා ගන්නා ආකාරය පිළිබඳව අයවැය මඟින් පැහැදිලි කිරීමක් සිදුකර නොමැති බවටද ඔහු චෝදනා කළේය.
ජාත්‍යන්තර මූල්‍ය අරමුදලේ (IMF) වැඩසටහන සම්බන්ධයෙන් රජය අනුගමනය කරන ප්‍රවේශය ප්‍රශ්න කළ අබේවර්ධන මහතා, ඊට අදාළ කටයුතු අධීක්ෂණය කිරීම සඳහා නව කමිටුවක් පත්කිරීමෙන් පාලන අධිකාරිය තුළ අභ්‍යන්තර බෙදීම් පවතින බවට හැඟී යන බවද සඳහන් කළේය.
ජීවන වියදම සහ ජනතාවගේ ණය බර
රටේ පවතින ජීවන වියදම පිළිබඳව අදහස් දක්වමින් එජාප සභාපතිවරයා පෙන්වා දුන්නේ, බොහෝ රාජ්‍ය සේවකයින් දැඩි මූල්‍ය පීඩනයකින් පෙළෙන අතර, ඇතැමුන් සිය මාසික වැටුපෙන් සියයට 60කට ආසන්න ප්‍රමාණයක් ණය වාරික ගෙවීම සඳහා වැය කරන බවයි. දෛනික වියදම් පියවා ගැනීම සඳහා සාමාන්‍ය ජනතාවට තම රන් ආභරණ සහ වටිනා දේපළ උකස් කිරීමට සිදුව ඇති බවත්, ණය පියවීමට නොහැකිවීමෙන් ඇතැමුන්ට එම උකස් භාණ්ඩ සින්න වී ඇති බවත් ඔහු පැවසීය. එවැනි පවුල් ආර්ථික දුෂ්කරතාවලින් මුදාගැනීමට අයවැය තුළ අර්ථවත් පියවර නොමැති බවට හෙතෙම චෝදනා කළේය.
හිටපු ජනාධිපති රනිල් වික්‍රමසිංහ මහතාගේ පාලන සමයේදී හඳුන්වා දුන් ආර්ථික ප්‍රතිපත්ති මඟින් ආර්ථික අර්බුදයෙන් පසු රට ස්ථාවර කිරීමට උපකාරී වූ බව සඳහන් කළ වජිර අබේවර්ධන මහතා, එම ආර්ථික ප්‍රකෘතිය ඉදිරියට පවත්වාගෙන යාම සඳහා වත්මන් පාලනය පැහැදිලි ආර්ථික දැක්මක් හෝ උපායමාර්ගයක් ඉදිරිපත් කිරීමට අපොහොසත් වී ඇති බවද වැඩිදුරටත් කියා සිටියේය.
