පාර්ලිමේන්තුවට නව ජනාධිපතිවරයෙකු තෝරා පත් කර ගන්නා තෙක් ශ්‍රී ලංකාවේ වැඩබලන ජනාධිපතිවරයා ලෙස තමන් කටයුතු කරන බව අග්‍රාමාත්‍ය රනිල් වික්‍රමසිංහ පවසනවා.
අද විශේෂ ප්‍රකාශයක් කරමින් වික්‍රමසිංහ කියා සිටියේ මෙම කාලය තුළ වැඩ බලන ජනාධිපතිවරයා ලෙස තමන් තාවකාලිකව කටයුතු කරන බවයි.
ශ්‍රී ලංකාවේ වැඩබලන ජනාධිපතිවරයා ලෙස පත්වීමෙන් පසු තමන් විසින් ප්‍රධාන තීරණ දෙකක් ගෙන ඇති බව රනිල් වික්‍රමසිංහ වැඩිදුරටත් නිවේදනය කළේය.
ඔහු පැවසුවේ පළමුවැන්න ජනාධිපතිවරයා සඳහා භාවිතා කරන “අතිගරුතුමනි” යන යෙදුම මින් ඉදිරියට භාවිතා නොකරන බවයි.
දෙවැන්න රටට අවශ්‍ය වන්නේ එක් ජාතික කොඩියක් පමණක් බැවින් ජනාධිපතිවරයාගේ නිල කොඩිය අහෝසි කරන බවද වික්‍රමසිංහ මහතා වැඩිදුරටත් පැවසීය.
අග්‍රාමාත්‍ය රනිල් වික්‍රමසිංහ මහතා ශ්‍රී ලංකාවේ වැඩබලන ජනාධිපතිවරයා ලෙස තාවකාලිකව ගත කරන කාලය තුළ ගත යුතු පහත සඳහන් ප්‍රධාන ක්‍රියාමාර්ග පිළිබඳව ද අවධානය යොමු කළේය.
ආණ්ඩුක්‍රම ව්‍යවස්ථාවේ 19 වැනි සංශෝධනය යළි ස්ථාපිත කිරීමට අවශ්‍ය පනත් කෙටුම්පත් ඉදිරිපත් කිරීමට පියවර ගෙන තිබේ.
ලබන සතියේ තේරී පත්වන නව ජනාධිපතිවරයාට 19 වැනි සංශෝධනය පාර්ලිමේන්තුවට ඉදිරිපත් කිරීමට කටයුතු කරමින් සිටිනවා.
රටේ නීතිය හා සාමය ආරක්ෂා කිරීමට පියවර ගෙන තිබෙනවා.
නව ජනාධිපතිවරයෙකු තෝරා පත් කර ගැනීම සඳහා මන්ත්‍රීවරුන්ට බලපෑම් කිරීමේ උත්සාහයක් පවතින බැවින් ඔවුන්ගේ ආරක්ෂාව වැඩි කර තිබේ.
රටේ නීතිය හා සාමය තහවුරු කිරීම සඳහා ත්‍රිවිධ හමුදාව සහ පොලිසිය ඇතුළත් කමිටුවක් පත් කර තිබෙනවා.
සර්ව පාක්ෂික අන්තර්වාර රජයක් පිහිටුවීම සම්බන්ධයෙන් පොදු එකඟතාවකට පැමිණෙන ලෙස සියලු පාර්ශ්වයන්ගෙන් ඉල්ලා තිබේ.
ආණ්ඩුක්‍රම ව්‍යවස්ථාව සුරකින බවත්, ආණ්ඩුක්‍රම ව්‍යවස්ථාව උල්ලංඝණය වන කිසිදු ක්‍රියාවකට ඉඩ නොතබන බවත්, සියලු පාර්ශ්වයන් ඒකරාශී කරගෙන රටේ අභිවෘද්ධිය වෙනුවෙන් එක්ව කටයුතු කරන බවත් වැඩබලන ජනාධිපතිවරයා නිගමනය කළේය.
