දැනට රට පුරා සිදුවන හදිසි ගෑස් සිලින්ඩර් පිපිරීම් සම්බන්ධයෙන් පාර්ශව කිහිපයක අදහස් සහ විසඳුම් ලබා ගැනීම සඳහා වෙළෙඳ කටයුතු පිළිබඳ අමාත්‍ය උපදේශක කමිටුවේ විශේෂ රැස්වීමක් බදාදා (01) පාර්ලිමේන්තුවේදී පැවැත්විණි.
වෙළෙඳ අමාත්‍ය ආචාර්ය බන්දුල ගුණවර්ධන මහතාගේ ප්‍රධානත්වයෙන් අමාත්‍යාංශ උපදේශක කාරක සභාව රැස්වූ අතර පැවති සාකච්ඡාවට සමූපකාර සේවා, අලෙවි සංවර්ධන සහ පාරිභෝගික ආරක්ෂණ රාජ්‍ය අමාත්‍ය ලසන්ත අලගියවන්න මහතාද එක්ව සිටියේය.
පසුගිය 30 වැනිදා පාර්ලිමේන්තුවේදී විපක්ෂය විසින් මතු කරන ලද කරුණු කිහිපයක් සම්බන්ධයෙන් වැඩිදුර සාකච්ඡා කිරීම සඳහා විශේෂ අමාත්‍යාංශ උපදේශක කාරක සභාව පැවැත්වුණේ ඒ සම්බන්ධයෙන් තවත් පාර්ශව කිහිපයක් සම්බන්ධ කර ගනිමින්.
වෙළඳ අමාත්‍යාංශය, සමුපකාර සේවා, අලෙවි සංවර්ධන සහ පාරිභෝගික ආරක්ෂණ රාජ්‍ය අමාත්‍යාංශය, තාක්ෂණ අමාත්‍යාංශය, නිපුණතා සංවර්ධන රාජ්‍ය අමාත්‍යාංශය, වෘත්තීය අධ්‍යාපන, පර්යේෂණ සහ නවෝත්පාදන අමාත්‍යාංශය, ශ්‍රී ලංකා පොලිසිය, පාරිභෝගික කටයුතු අධිකාරිය, මිනුම් ඒකක දෙපාර්තමේන්තුව, ප්‍රමිති සහ සේවා, ලිට්‍රෝ ගෑස් ලංකා ලිමිටඩ්, ලාෆ්ස් ගෑස් පීඑල්සී, ශ්‍රී ලංකා ප්‍රමිති ආයතනය, ශ්‍රී ලංකා ප්‍රතීතන මණ්ඩලය, ලංකා ඛනිජ තෙල් නීතිගත සංස්ථාව, බලශක්ති අමාත්‍යාංශය සහ රජයේ රස පරීක්ෂක දෙපාර්තමේන්තුව නියෝජනය කරමින් නිලධාරීන් පිරිසක් මෙම හමුවට එක්ව සිටියහ.
තවද, මොරටුව විශ්වවිද්‍යාලය නියෝජනය කරමින් ශ්‍රී ජයවර්ධනපුර විශ්වවිද්‍යාලයේ හිටපු මහාචාර්ය, මහාචාර්ය ඩබ්ලිව්.ඩී.ඩබ්ලිව්.ජයතිලක, මහාචාර්ය ශාන්ත වල්පොලගේ යන මහත්වරු ද මේ අවස්ථාවට එක්ව සිටියහ. ඛනිජ තෙල් විශේෂඥ නිමල් ද සිල්වා මහතා ද කමිටුවට එක් විය.
හැකි ඉක්මනින් ලිඛිතව පිළිතුරක් ලබාදෙන ලෙස ඉල්ලා විපක්ෂ නායක සජිත් ප්‍රේමදාස අමාත්‍යවරුන්ගේ උපදේශක කාරක සභාවේදී ප්‍රශ්න කිහිපයක් ඉදිරිපත් කළා.
ගෑස් පිපිරීම් සම්බන්ධව පැමිණ සිටි සියලුම පක්ෂවල සහ මන්ත්‍රීවරුන්ගේ අදහස් විමසන ලද අතර දැනට පවතින පිපිරීම්වලට ගෑස් වෙනස් වීම බලපා තිබේද යන්න, උසස් තත්ත්වයේ උපාංග භාවිතයේ වැදගත්කම, ගෑස් ඉන් පසුව වෙළෙඳපොළට නිකුත් කිරීම සම්බන්ධයෙන් එකඟතා කිහිපයක් ඇති කර ගන්නා ලදී. වායු දුගඳ පිළිබඳ වාර්තාවක් ලබා ගැනීම, ජනාධිපතිවරයා විසින් පත් කරන ලද කමිටුවේ වාර්තා සති දෙකක් ඇතුළත ලබා ගැනීම සහ එහි නිර්දේශ කඩිනමින් ක්‍රියාත්මක කිරීම, නැවේ ඇති ආනයනික ගෑස්වල ප්‍රමිතිය මෙරටට ඇතුළු වීමට පෙර පරීක්ෂා කිරීම මෙහිදී සිදු විය.
විපක්ෂ නායක සජිත් ප්‍රේමදාස, විපක්ෂයේ ප්‍රධාන සංවිධායක ලක්ෂ්මන් කිරිඇල්ල, අමාත්‍යවරුන් වන වාසුදේව නානායක්කාර, උදය ගම්මන්පිල, නිමල් සිරිපාල ද සිල්වා, මහින්දානන්ද අලුත්ගමගේ, රාජ්‍ය අමාත්‍යවරුන් සහ පාර්ලිමේන්තු මන්ත්‍රීවරුන් ඇතුළු විශාල පිරිසක් මෙම විශේෂ රැස්වීමට එක්ව සිටියහ.
