ශ‍්‍රී ලංකාවේ පෙට්රල් සම්බන්ධයෙන් පවතින තත්ත්වය පිළිබඳව බලශක්ති අමාත්‍ය කාංචන විජේසේකර අද පාර්ලිමේන්තුවේදී කරුණු පැහැදිලි කළා.
අවශ්‍ය පෙට්රල් තොග සහිත යාත්‍රාවක් මුදා හැරීමට ඊයේ මුදල් ගෙවා ඇති බව ඔහු පැවසීය.
අමාත්‍යවරයා වැඩිදුරටත් කියා සිටියේ ඉන්ධන බෙදා හැරීම ආරම්භ කිරීමට තවත් දින දෙකක කාලයක් ගතවනු ඇති බවයි.
පසුගිය අප්‍රේල් 28 වැනිදා සිට කොළඹ වරායේ නැංගුරම් ලා තිබූ පෙට්රල් සහිත නැවක් රජයට ගෙවීමට ඩොලර් ලබා ගැනීමට නොහැකි වීම නිසා එය මුදා හැර නොමැති බව අමාත්‍යවරයා මීට පෙර අනාවරණය කළේය.
මේ හේතුවෙන් රට තුළ දැඩි පෙට්රල් හිඟයක් ඇති වූ බවත්, එහි ප්‍රතිඵලයක් ලෙස ජනතාව දින ගණන් ඉන්ධන පිරවුම්හල්වල පෝලිම්වල රැඳී සිටින බවත් ඔහු පැවසීය.
මේ අතර, අග්‍රාමාත්‍ය රනිල් වික්‍රමසිංහ මහතා විසින් මෙරට ද්‍රව පෙට්‍රෝලියම් වායුවේ (LPG) තත්ත්වය පිළිබඳව යාවත්කාලීනයක් ලබා දී තිබේ.
ට්විටර් පණිවුඩයක් නිකුත් කරමින් අග්‍රාමාත්‍යවරයා කියා සිටියේ ඊයේ පොරොන්දු වූ පරිදි එල්පීජී අඩංගු යාත්‍රාවෙන් ගෑස් ගොඩබා නොමැති බවයි.
“ලිට්‍රෝ ගෑස් ලංකා සමාගම ඊයේ දිනයේදී යාත්‍රාවෙන් ලොරි රථ මගින් ගෑස් ගොඩ බාන බවට සහතිකයක් ලබාදුන්නත් එය සිදුවී නැහැ” යැයි ඔහු පැවසීය.
මේ සම්බන්ධයෙන් කඩිනමින් පැහැදිලි කිරීමක් කරන ලෙස ලිට්‍රෝ ගෑස් ලංකා සමාගමේ සභාපතිවරයාට උපදෙස් දුන් බවද අග්‍රාමාත්‍යවරයා පැවසීය.
ලිට්‍රෝ ගෑස් ලංකා සමාගමේ නිලධාරීන් ද කැඳවන ලෙස පොදු ව්‍යාපාර පිළිබඳ කාරක සභාව (කෝප්) ඉල්ලා ඇති බව ද අග්‍රාමාත්‍ය රනිල් වික්‍රමසිංහ මහතා පැවසීය.
