බලංගොඩ මහා පරිමාණ කසිප්පු තොගයක් වටලයි – 24 හැවිරිදි තරුණයෙක් අත්අඩංගුවට
බලංගොඩ ප්‍රදේශයේදී විශාල නීතිවිරෝධී මත්පැන් තොගයක් සහ ඒවා නිෂ්පාදනය කිරීමට යොදාගන්නා උපකරණ සමඟ 24 හැවිරිදි සැකකරුවෙකු පොලීසිය විසින් අත්අඩංගුවට ගෙන තිබේ.
බලංගොඩ පොලිස් ස්ථානය වෙත ලැබුණු තොරතුරකට අනුව වලේබොඩ උඩකන්ද ප්‍රදේශයේ සිදුකළ වැටලීමකදී සිකුරාදා (නොවැම්බර් 13) සවස මෙම අත්අඩංගුවට ගැනීම සිදුකර ඇති බව පොලීසිය පවසයි.
එම වැටලීමේදී බෝතල් 100 කට සමාන නීතිවිරෝධී මත්පැන් ලීටර් 75 ක් සහ බැරල් තුනක ගබඩා කර තිබූ ගෝඩා ලීටර් 510 ක් පොලිස් නිලධාරීන් විසින් සොයාගෙන ඇත. ඊට අමතරව නීතිවිරෝධී මත්පැන් පෙරීම සඳහා භාවිත කරන උපකරණ ද පොලිස් භාරයට ගෙන තිබේ.
අත්අඩංගුවට ගත් සැකකරු බලංගොඩ ප්‍රදේශයේම පදිංචිකරුවෙකි. සිද්ධිය සම්බන්ධයෙන් බලංගොඩ පොලීසිය වැඩිදුර විමර්ශන සිදු කරයි.
