මාර්තු මස මුල සිට හෝ බොහෝ විට පෙබරවාරි මැද භාගය වන විට දිවයිනේ නිශ්චිත විදුලි කප්පාදුවක් සිදුවනු ඇතැයි තමන් පුරෝකථනය කරන බව බලශක්ති අමාත්‍ය උදය ගම්මන්පිල පවසයි.
WION News සමඟ සම්මුඛ සාකච්ඡාවකට එක්වෙමින් අමාත්‍යවරයා මෙම අදහස් පළ කළේය.
ඉන්ධන ආනයනය කිරීමට අවශ්‍ය ඩොලර් ලබා ගැනීමට නොහැකිව රට මුහුණ දී සිටින විදේශ විනිමය අර්බුදය විදුලි අර්බුදයට හේතුව දැයි විමසූ විට අමාත්‍යවරයා කියා සිටියේ එය ප්‍රධාන හේතුව නොවන බවයි.
“රටේ වාර්ෂික විදුලි ඉල්ලුම වාර්ෂිකව 8% කින් වර්ධනය වේ. අවාසනාවකට මෙන්, 2014 සිට රට තුළ පුනර්ජනනීය හෝ තාප බලාගාර එකතු කිරීමක් සිදු නොවීය.
“එබැවින්, ජලාශවල ජල මට්ටම අඩුවීම හේතුවෙන් ජල විදුලි බලාගාරවලට ප්‍රමාණවත් විදුලිය උත්පාදනය කිරීමට නොහැකි බැවින්, පවතින බලාගාරවලට ජනවාරි සිට අප්‍රේල් දක්වා වියළි කාලවලදී විදුලි ඉල්ලුම සපුරාලීමට නොහැකි වේ.” ඔහු වැඩිදුරටත් කියා සිටියේය.
ඉන්ධන නොමැතිකම හේතුවෙන් තාප බලාගාර කිහිපයක් ක්‍රියාත්මක වීම නවතා දැමීම නිසා පසුගිය සති කිහිපය තුළ ශ්‍රී ලංකාව දිනකට පැය කිහිපයක් සැලසුම් සහගත සහ සැලසුම් රහිත කඩින් කඩ විදුලිය විසන්ධි කරනු දක්නට ලැබිණි.
බලශක්ති අමාත්‍ය උදය ගම්මන්පිල මහතා මීට පෙර රජයට අයත් ලංකා ඛනිජ තෙල් නීතිගත සංස්ථාවෙන් (සිපෙට්කෝ) ලංකා විදුලිබල මණ්ඩලයට ඉන්ධන සැපයීම ප්‍රතික්ෂේප කර තිබුණේ ඩොලර් හිඟය සහ ලංවිමට ණය නොගෙවූ බව පවසමිනි.
