සත්වයාගේ සෞඛ්‍ය තත්ත්වය පිළිබඳ නවතම තොරතුරු ලබාදෙමින් දෙපාර්තමේන්තුව සඳහන් කර ඇත්තේ, පශු වෛද්‍යවරුන්ගේ අධීක්ෂණය යටතේ සීබ්‍රා සතා ඉක්මනින් සුවය ලබමින් සිටින බවයි.
සැප්තැම්බර් 29 වැනිදා සිට සීබ්‍රා සතා රෝගී ලක්ෂණ පෙන්නුම් කර ඇති අතර, ඒ අනුව පශු වෛද්‍ය නිලධාරීන් විසින් රසායනාගාර පරීක්ෂණ සහ ස්කෑන් පරීක්ෂණ සිදුකර තිබේ.
එම පරීක්ෂණවලදී සත්වයාගේ ආහාර ජීර්ණ පද්ධතියේ අවහිරතාවක් ඇති බව අනාවරණය වී ඇති අතර, එය ඉවත් කිරීම සඳහා කඩිනම් සැත්කමක් සිදුකිරීම අවශ්‍ය වී ඇත.
ඒ අනුව, ඔක්තෝබර් 9 වැනිදා ජාතික සත්වෝද්‍යාන දෙපාර්තමේන්තුවේ පශු වෛද්‍ය නිලධාරීන් සහ කාර්ය මණ්ඩලයේ සහභාගීත්වයෙන් විශේෂ හදිසි සැත්කමක් සිදුකර තිබේ.
අශ්ව විශේෂයට අයත් සතුන් පිළිබඳ විශේෂඥ දැනුමක් ඇති පේරාදෙණිය විශ්වවිද්‍යාලයේ පශු වෛද්‍ය පීඨයේ ජ්‍යෙෂ්ඨ කථිකාචාර්ය ආචාර්ය දම්මික පෙරේරා මහතාගේ මඟපෙන්වීම සහ සහභාගීත්වය යටතේ මෙම සැත්කම සිදුකර ඇත.
පසුදා අලුයම දක්වා පැය කිහිපයක් පුරා පැවති සැත්කමේදී, ආහාර ජීර්ණ පද්ධතියේ අවහිරතාව ඇති කිරීමට හේතු වූ දිරවා නොගත් ආහාර ගුලියක් සාර්ථකව ඉවත් කිරීමට පශු වෛද්‍ය ශල්‍ය වෛද්‍යවරුන් සමත් වී තිබේ.
සැත්කමෙන් පසු දින කිහිපයක් සීබ්‍රා සතා පශු වෛද්‍යවරුන්ගේ සමීප අධීක්ෂණය යටතේ තබා ඇත.
මේ වන විට සත්වයා යහපත් සුවයෙන් පසුවන බවත්, සාමාන්‍ය පරිදි ආහාර ගැනීම නැවත ආරම්භ කර ඇති බවත් ජාතික සත්වෝද්‍යාන දෙපාර්තමේන්තුව තහවුරු කර තිබේ.
මෙම සාර්ථක සැත්කම සහ සීබ්‍රා සතාගේ සුවය වෙනුවෙන් දායක වූ ආචාර්ය දම්මික පෙරේරා මහතාට, පශු වෛද්‍ය හසිත රූපතුංග මහතාට, දෙහිවල සත්වෝද්‍යාන පශු වෛද්‍ය රෝහලේ කාර්ය මණ්ඩලයට සහ සත්ව රැකවරණ කණ්ඩායම්වලට ද දෙපාර්තමේන්තුව සිය ප්‍රශංසාව පළ කර ඇත.
