අපරාධ පරීක්ෂණ දෙපාර්තමේන්තුව විසින් අත්අඩංගුවට ගත් රුවන් චමිල ප්‍රසන්න හෙවත් දෙමටගොඩ රුවන් නොවැම්බර් 05 වැනිදා දක්වා රක්ෂිත බන්ධනාගාරගත කිරීමට කොළඹ අතිරේක මහේස්ත්‍රාත් ලෝචනා අබේවික්‍රම මහත්මිය ඊයේ (30) නියෝග කළාය.
රුවන් චමිල ප්‍රසන්න හෙවත් දෙමටගොඩ රුවන් පසුගිය 29 වැනිදා අපරාධ පරීක්ෂණ දෙපාර්තමේන්තුවේ නීතිවිරෝධී වත්කම් හා දේපළ විමර්ශන කොට්ඨාශය විසින් මුදල් විශුද්ධිකරණ පනත යටතේ හෙරොයින් ජාවාරමෙන් උපයාගත් රුපියල් බිලියන ගණනක දේපළ අත්පත් කර ගැනීම සම්බන්ධයෙන් සිදුකළ වැටලීමකදී දෙමටගොඩ පිහිටි ඔහුගේ නිවසේදී අත්අඩංගුවට ගනු ලැබීය.
මත්ද්‍රව්‍ය ජාවාරමෙන් උපයාගත් මුදලින් මිලදී ගත් බව කියන සුඛෝපභෝගී වාහන 6ක් ද පොලිස් භාරයට ගෙන තිබෙනවා.
මහේස්ත්‍රාත්වරයා මෙම නියෝගය නිකුත් කළේ පැමිණිල්ලේ ඉදිරිපත් කර ඇති කරුණු අනුව සැකකරු රක්ෂිත බන්ධනාගාර ගත කරන බවයි. මෙම විමර්ශනයේ මුළු වටිනාකම රු. මිලියන 180 ක් වැය වන නිසා පුළුල් හා තාක්ෂණික පරීක්ෂණයක් පැවැත්විය යුතුය.
සැකකරු වෙනුවෙන් පෙනී සිටි නීතිඥ සංජය ගමගේ මහතා ප්‍රකාශ කළේ ඇප පනත යටතේ මෙම වරද ඇප දිය හැකි බැවින් තම සේවාදායකයා නිදහස් කළ යුතු බවයි.
මහා පරිමාණ මත්ද්‍රව්‍ය ජාවාරම්කරුවෙකු බව කියන දෙමටගොඩ රුවන් 2017-2019 කාලය තුළ මුහුදු මාර්ගයෙන් ශ්‍රී ලංකාවට රුපියල් බිලියන 7ක හෙරොයින් තොගයක් රැගෙන ආ බව පොලිසිය පවසයි.
මෙම කාලය තුළ හෙරොයින් කිලෝ 720ක්, අයිස් (ක්‍රිස්ටල් මෙතම්ෆෙටමින්) කිලෝ 321ක් සහ හෂීස් කිලෝ 30ක් නීතිවිරෝධී ලෙස මෙරටට ගෙනවිත් ඇති බව මූලික විමර්ශනවලදී අනාවරණය වී ඇතැයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නිහාල් තල්දූව මහතා පැවැසීය.
මෙම වසරේ අපේ‍්‍රල් මාසයේදී ඉන්දීය වෙරළාරක්ෂක බළකාය විසින් හෙරොයින් කිලෝ 340ක් රැගෙන සැකකරුවන් පස්දෙනෙකු සමඟ බහුදින යාත්‍රාවක් අත්අඩංගුවට ගත් අතර එම මත්කුඩු තොගය ද දෙමටගොඩ රුවන් වෙත රැගෙන එමින් තිබූ බව අනාවරණය වූ බව පොලිස් මාධ්‍ය ප්‍රකාශකවරයා පැවසීය.
සැකකරුවන් සතුව තිබූ චන්ද්‍රිකා දුරකථනයක් ඔස්සේ සිදුකළ විමර්ශනයේදී මේ බව අනාවරණ වූ බවයි පොලිස් මාධ්‍ය ප්‍රකාශකවරයා වැඩිදුරටත් සඳහන් කළේ.
2019 වසරේ බහුදින යාත්‍රාවකින් මෙරටට ප්‍රවාහනය කරමින් තිබූ හෙරොයින් කිලෝ 200ක් නාවික හමුදාව භාරයට ගත් බවත්, එම මත්කුඩු තොගය දෙමටගොඩ රුවන් වෙත රැගෙනවිත් තිබූ බවට පරීක්ෂණවලදී අනාවරණය වූ බවත් ඔහු පැවසීය.
2019 වසරේ පමණක් හෙරොයින් කිලෝ 200ක්, අයිස් කිලෝ 5ක් සහ හෂීස් කිලෝ 30ක් නීතිවිරෝධී ලෙස මෙරටට ගෙනවිත් ඇති බවට අනාවරණය වී ඇතැයි පොලිස් මාධ්‍ය ප්‍රකාශකවරයා පැවසීය. මත්ද්‍රව්‍ය ජාවාරම්කරු මේ වසරේ අයිස් කිලෝ 21ක් ගෙනවිත් තිබෙනවා.
