ගෙයක් ඇතුළේ නිදන් හෑරූ තිදෙනෙක් නිකවැරටියේදී කොටුවෙති
නිකවැරටිය ප්‍රදේශයේ නිවසක් තුළ පුරාවස්තු සෙවීමේ අරමුණින් නීතිවිරෝධී ලෙස කැණීම් සිදු කළ බවට සැකපිට පුද්ගලයන් තිදෙනෙකු පොලීසිය විසින් අත්අඩංගුවට ගෙන තිබේ.
නිකවැරටිය පොලිස් ස්ථානය වෙත ලැබුණු තොරතුරකට අනුව දිවුල්ලේගොඩ ප්‍රදේශයේ සිදුකළ වැටලීමකදී සිකුරාදා (නොවැම්බර් 13) පස්වරුවේ මෙම සැකකරුවන් අත්අඩංගුවට ගත් බව පොලීසිය පවසයි.
නිවස තුළ නීත්‍යානුකූල අවසරයකින් තොරව සැකකරුවන් කැණීම් සිදු කරමින් සිටි බව නිලධාරීන් විසින් අනාවරණය කරගෙන ඇති අතර, එම ස්ථානයේ තිබූ කැණීම් උපකරණ සහ පූජා කටයුතු සඳහා යොදාගන්නා භාණ්ඩ ද පොලිස් භාරයට ගෙන තිබේ.
අත්අඩංගුවට ගත් සැකකරුවන් තිදෙනා වයස අවුරුදු 20 ත් 42 ත් අතර පසුවන දිවුල්ලේගොඩ ප්‍රදේශයේම පදිංචිකරුවන් වේ. සිද්ධිය සම්බන්ධයෙන් නිකවැරටිය පොලීසිය වැඩිදුර විමර්ශන සිදු කරයි.
