Aeroflot ගුවන් යානයක් ශ්‍රී ලංකාවේ රඳවා තබා ගැනීම සම්බන්ධයෙන් රුසියානු විදේශ අමාත්‍යාංශය මොස්කව් හි ශ්‍රී ලංකා තානාපති ජනිත අබේවික්‍රම ලියනගේ කැඳවා විරෝධය පළ කර තිබේ.
“ජූනි 2 වැනි දින බණ්ඩාරනායක ජාත්‍යන්තර ගුවන් තොටුපළේදී මොස්කව් බලා පිටත් වීමට සූදානම් වන සාමාන්‍ය Aeroflot ගුවන් යානයක් රඳවා තබා ගැනීමට ශ්‍රී ලංකාවේ අධිකරණ බලධාරීන් ගත් පදනම් විරහිත තීරණය සම්බන්ධයෙන් රාජ්‍යතාන්ත්‍රික දූත මණ්ඩල ප්‍රධානියා විරෝධය පළ කළේය.
“සාම්ප්‍රදායිකව මිත්‍රශීලී ද්විපාර්ශ්වික සබඳතා කෙරෙහි එහි අහිතකර බලපෑම වළක්වා ගැනීම සඳහා මෙම ගැටලුව හැකි ඉක්මනින් විසඳා ගන්නා ලෙස අපි ශ්‍රී ලංකා පාර්ශ්වයෙන් ඉල්ලා සිටිමු” යැයි රුසියානු විදේශ අමාත්‍යාංශය ප්‍රකාශ කළ බව Tass රුසියානු පුවත් ඒජන්සිය පවසයි.
අධිකරණ නියෝගයක් හේතුවෙන් මොස්කව් බලා පිටත්ව යන රුසියානු රජයට අයත් Aeroflot ගුවන් යානයකට බ්‍රහස්පතින්දා කටුනායක බණ්ඩාරනායක ජාත්‍යන්තර ගුවන් තොටුපළෙන් පිටවීමට අවසර නොලැබුණි.
අයර්ලන්ත සමාගමක් වන Celestial Aviation Trading Limited විසින් ගොනු කරන ලද පැමිණිල්ලක් විභාග කිරීමෙන් අනතුරුව කොළඹ වාණිජ මහාධිකරණ විනිසුරුවරයා මෙම වාරණ නියෝගය නිකුත් කළේය.
කොළඹ වාණිජ මහාධිකරණය විසින් නිකුත් කරන ලද වාරණ නියෝගයට එරෙහිව ශ්‍රී ලංකා රජය ද ඊයේ විරෝධතා ඉදිරිපත් කළ අතර අතිරේක සොලිසිටර් ජනරාල් සුමති ධර්මවර්ධන මහත්මිය එම වාරණ නියෝගය අත්හිටුවන ලෙස අධිකරණයෙන් ඉල්ලා සිටියාය.
සංචාරක අමාත්‍ය හරීන් ප්‍රනාන්දු ද මේ සම්බන්ධයෙන් කනස්සල්ල පළ කර ඇත්තේ රුසියානු සංචාරකයින් පැමිණීමත් සමඟ සංචාරක කර්මාන්තයට එය බලපෑ හැකි බව පවසමිනි.
