පසුගිය සතිය තුළ ඉන්දියාව ශ්‍රී ලංකාවට ඩොලර් මිලියන 900 කට වැඩි විදේශ විනිමය ආධාර ලබා දී ඇති බව ශ්‍රී ලංකාවේ ඉන්දීය මහ කොමසාරිස් කාර්යාලය අද නිවේදනය කළේය.
මහ කොමසාරිස් කාර්යාලය පැවසුවේ, එම මූල්‍ය ආධාර සඳහා මෙරටට ඩොලර් මිලියන 400 ක මුදල් හුවමාරුවක් ද ඇතුළත් බවයි.
ඉන්දියාව විසින් කල් දමා ඇති ආසියානු නිෂ්කාශන සංගමයේ බේරුම්කරණ රාමුව යටතේ ගෙවීමට නියමිතව තිබූ තවත් ඇමෙරිකානු ඩොලර් මිලියන 500ක් ද ඊට ඇතුළත් බව එහි වැඩිදුරටත් සඳහන් වේ.
මේ සම්බන්ධයෙන් තම මහ කොමසාරිස්වරයා ශ්‍රී ලංකා මහ බැංකුවේ (CBSL) අධිපති අජිත් නිවාඩ් කබ්රාල් හමුවූ බව ශ්‍රී ලංකාවේ ඉන්දීය මහ කොමසාරිස් කාර්යාලය වැඩිදුරටත් සඳහන් කළේය.
මෙම හමුවේදී ශ්‍රී ලංකාවට ඉන්දියාවේ ප්‍රබල සහය ප්‍රකාශ කළ මහ කොමසාරිස්වරයා, ආර්ථික ප්‍රකෘතිය සහ වර්ධනය සඳහා ශ්‍රී ලංකාව සමඟ සිට ගැනීමට ඉන්දියාව දක්වන දැඩි කැපවීමට මෙම පියවර අනුකූල බව ද සඳහන් කර ඇත.
ඉන්දියාවෙන් මූල්‍ය ආධාර ලැබෙන්නේ ශ්‍රී ලංකාව සිය නිල සංචිත ක්ෂය වීමත් සමඟ දැඩි ආර්ථික අර්බුදයකට මුහුණ දී සිටින අවස්ථාවක ය.
වත්මන් ආර්ථික අර්බුදය විසඳීම සඳහා ශ්‍රී ලංකාව ළඟා වී ඇති තවත් රටවල් කිහිපයක් අතර ඉන්දියාව ද වේ.
