ඇංගුලාන මුහුදේදී වේග ප්රහාරක යාත්රාවක් අනතුරට පත්වීමෙන් පසු අතුරුදන් වූ ශ්රී ලංකා නාවික හමුදා නිලධාරියා සොයා සිදුකරන මෙහෙයුම් අඟහරුවාදා වන විට අඛණ්ඩව සිව්වැනි දිනටත් ක්රියාත්මක බව ශ්රී ලංකා නාවික හමුදාව පවසයි.
P 4447 දරන වේග ප්රහාරක යාත්රාව අගෝස්තු 15 වැනි සෙනසුරාදා පෙරවරු 11.40ට පමණ, ඇංගුලාන මුහුදු ප්රදේශයේ සාමාන්ය මුර සංචාරයකින් ආපසු පැමිණෙමින් සිටියදී මුහුදු අනතුරකට ලක්ව තිබේ.
යාත්රාවේ සිටි නාවික හමුදා සාමාජිකයන් 11 දෙනෙකු ඇංගුලාන පොලිසිය සහ ප්රදේශයේ ධීවරයන්ගේ සහායෙන් බේරාගෙන ඇති අතර, ඔවුන් මේ වන විට රෝහල්ගතව ප්රතිකාර ලබන අතර ස්ථාවර තත්ත්වයේ පසුවන බව නාවික හමුදාව සඳහන් කරයි.
අතුරුදන්ව සිටින නාවික නිලධාරියා සොයා ගැනීම සහ අනතුරට පත් යාත්රාව ගොඩගැනීම සඳහා ශ්රී ලංකා ගුවන් හමුදාව සමඟ සම්බන්ධීකරණයෙන් නාවික හමුදාව මෙහෙයුම් ආරම්භ කර තිබේ.
අගෝස්තු 16 වැනිදා අලුයම ආරම්භ කළ මෙහෙයුමකින් අනතුරුව නාවික කිමිදුම්කරුවන් විසින් යාත්රාව ගොඩගෙන ඇති බවද නාවික හමුදාව පවසයි. කෙසේ වෙතත්, පසුගිය දින කිහිපය තුළ පැවති රළු මුහුදු තත්ත්වය හේතුවෙන් යාත්රාව ඇදගෙන යාමේ කටයුතු අඩාල වී තිබේ.
බේරාගත් නාවිකයන්ගෙන් ලබාගත් මූලික තොරතුරු අනුව, එම යාත්රාව ප්රදේශයේ මුහුද යට තිබූ ගිලුණු යාත්රාවක හෝ වෙනත් අවශේෂයක ගැටෙන්නට ඇති බවට සැකයක් පවතින බව නාවික හමුදාව සඳහන් කළේය.
කෙසේ වෙතත්, මෙම කරුණ ඇතුළු අනතුරට හේතු වූ විය හැකි සියලු තත්ත්වයන් පිළිබඳව මේ වන විට විමර්ශනය කරමින් පවතී.
සිද්ධිය සම්බන්ධයෙන් මූලික විමර්ශනයක් සිදු කිරීම සඳහා විශේෂඥයන්ගෙන් සමන්විත කමිටුවක්ද පත් කර ඇති බව නාවික හමුදාව වැඩිදුරටත් සඳහන් කළේය.
