ලෝකයේ වඳවී යාමේ තර්ජනයට ලක්ව ඇති විශේෂයක් වන අරාබි ඔරික්ස් මීට සති දෙකකට පෙර දෙහිවල ජාතික සත්වෝද්‍යානයේදී පැටවෙකු බිහි කළ බව ජාතික සත්වෝද්‍යාන අධ්‍යක්ෂ ජනරාල් ශර්මිලා රාජපක්ෂ මහත්මිය පැවසුවාය.
අරාබි ඔරික්ස් පැටවා යහපත් සෞඛ්‍ය තත්ත්වයෙන් පසුවන බවත් පැටවා තම මවගේ කිරි බොන බැවින් මුක්ත කලාපයක තම මව සමඟ මහජන ප්‍රදර්ශනයට තබා ඇති බවත් ඇය පැවසුවාය.
අරාබි ඔරික්ස් 1970 ගණන්වල ලෝකයේ වඳවීමේ තර්ජනයට ලක් වූ විශේෂ අතරින් එකක් වූ අතර එය අරාබි කාන්තාරයේ පමණක් 1,000 කට සීමා විය.
1980 වන විට සත්වෝද්‍යාන තුළ ඇති කරන ලද සතුන් 6,000 සිට 7,000 දක්වා වූ අතර, ඒ සියල්ල අරාබි අර්ධද්වීපයට මුදා හරින ලදී.
මෙම සතුන් ශාකභක්ෂක සහ ක්ෂීරපායී වන අතර සාමාන්‍ය ආයු කාලය අවුරුදු 20 ක් පමණ වේ. ගැහැණු සතෙකුගේ ගර්භණී කාලය මාස අටක් වන අතර, ඇය වරකට එක් දරුවෙකු පමණක් බිහි කරයි.
මෙම සතුන්ගේ දිගු අං දෙක ස්වභාවිකවම ආත්මාරක්ෂාව සඳහා වන අතර, පැටවා ඉපදී දින 20 කට පමණ පසු අං පරිණත වී වේගයෙන් වර්ධනය වීමට පටන් ගනී.
