හිටපු හමුදාපති ගාඩි අයිසෙන්කොට් ඊශ්‍රායලයේ නව අගමැති වෙයිද?
පසුගියදා පැවැති ඊශ්‍රායල මහ මැතිවරණයෙන් කිසිදු පක්ෂයකට හෝ සන්ධානයකට පැහැදිලි බහුතරයක් හිමි නොවූ පසුබිමක, එරට නව ආණ්ඩුව පිහිටුවීමේ ප්‍රථම අවස්ථාව හිටපු හමුදාපති ගාඩි අයිසෙන්කොට් (Gadi Eisenkot) මහතා වෙත ලබාදීමට ඊශ්‍රායල ජනාධිපති අයිසැක් හර්සොග් (Isaac Herzog) තීරණය කර තිබේ.
ඒ අනුව දීර්ඝ කාලයක් එරට අගමැති ධුරය දැරූ බෙන්ජමින් නෙතන්යාහු මහතාව ධුරයෙන් පහකර නව පාලනයක් පිහිටුවීමට හිටපු හමුදාපතිවරයාට ප්‍රබල අවස්ථාවක් උදාවී ඇත.
පසුගිය සෙනසුරාදා (07) ජනාධිපතිවරයා මේ පිළිබඳව අයිසෙන්කොට් මහතා වෙත නිල වශයෙන් දැනුම් දී ඇති අතර, ඊට අදාළ නිල පත්වීමේ ලිපිය ජනාධිපති නිල නිවසේදී පිරිනැමීමට නියමිතය. ඔක්තෝබර් 27 වැනිදා පැවති මහ මැතිවරණයෙන් අනතුරුව ප්‍රධාන දේශපාලන පක්ෂ සමඟ සිදුකළ දීර්ඝ සාකච්ඡාවලින් පසුව ජනාධිපතිවරයා මෙම තීරණය ගෙන තිබේ.
මන්ත්‍රීවරුන් 67කගේ සහයෝගය
සාමාජිකයන් 120කින් සමන්විත ඊශ්‍රායල ‘නෙසට්’ (Knesset) පාර්ලිමේන්තුව තුළ, ‘යාෂාර්’ (Yashar) පක්ෂයේ නායක ගාඩි අයිසෙන්කොට් මහතාට ආණ්ඩුවක් පිහිටුවීම සඳහා මන්ත්‍රීවරුන් 67 දෙනෙකුගේ සහයෝගය හිමිවූ අතර, නෙතන්යාහුට සහය පළකර තිබුණේ මන්ත්‍රීවරුන් 46 දෙනෙකු පමණි.
කෙසේවෙතත්, පාර්ලිමේන්තුවේ සරල බහුතරය වන ආසන 61ක සීමාව තනිව සපුරා ගැනීමට කිසිදු පාර්ශ්වයකට නොහැකි වී ඇත. අයිසෙන්කොට්ගේ සිව්පාර්ශ්වික සන්ධානය ආසන 48ක් හිමිකරගෙන ඇති අතර, නෙතන්යාහුගේ දක්ෂිණාංශික හා ආගමික පිල ආසන 53ක් දිනාගෙන තිබේ. මෙවර මැතිවරණයේදී වාර්තාගත ආසන 19ක් දිනාගත් අරාබි නායකත්වයෙන් යුත් පක්ෂද අයිසෙන්කොට්ට සහය පළකළද, ඔවුන් සමඟ එක්ව සභාග ආණ්ඩුවක් පිහිටුවීම අයිසෙන්කොට් විසින් ප්‍රතික්ෂේප කර ඇත.
රජය පිහිටුවීමට දින 28ක කාලයක්
ඒ අනුව, පාර්ලිමේන්තු බහුතරය තහවුරු කරගනිමින් නව රජයක් පිහිටුවීම සඳහා අයිසෙන්කොට් මහතාට දින 28ක කාලයක් හිමිවන අතර, අවශ්‍ය වුවහොත් තවත් දින 14ක අතිරේක කාලයක් ලබාගැනීමටද හැකියාව පවතී.
ඔහු මෙම සභාග ආණ්ඩු සාකච්ඡා සාර්ථක කරගතහොත්, වසර ගණනාවක් පුරා අගමැති ධුරය දැරූ බෙන්ජමින් නෙතන්යාහුට සිය ධුරය අහිමි වනු ඇත. නව රජයක් පිහිටුවන තුරු නෙතන්යාහු තාවකාලිකව අගමැති ධුරයේ රැඳී සිටින නමුත්, මෙම තීරණය නෙතන්යාහුගේ දේශපාලන ගමන්මගට එල්ල වූ ප්‍රබලතම පසුබෑමක් ලෙස ජාත්‍යන්තර දේශපාලන විචාරකයෝ පෙන්වා දෙති.
