ශ්‍රී ලංකා පොදුජන පෙරමුණට මැතිවරණවලින් සියයට 70කට වැඩි ඡන්ද ප්‍රමාණයක ප්‍රතිසංවිධානය වී ඇති බැවින් ඕනෑම මැතිවරණයක් ජයග්‍රහණය කළ හැකි බව හිටපු අමාත්‍ය සහ පාර්ලිමේන්තු මන්ත්‍රී ජොන්ස්ටන් ප්‍රනාන්දු මහතා පැවසීය.
“බොහෝ දෙනෙක් කිව්වා ශ්‍රී ලංකා පොදුජන පෙරමුණේ පාක්ෂිකයින්ට ආයෙමත් මැතිවරණ කොට්ඨාශවලට යන්න බැරි වෙයි කියලා. ගිය අවුරුද්දේ අපිට ප්‍රහාරයක් එල්ල වුණාට පස්සේ ගොඩක් අය දැරූ මතවාදය තමයි මේක. කොහොම වුණත් සියයට 70කට වැඩි ඡන්ද ප්‍රමාණයක ප්‍රතිසංවිධානය වෙන්න අපිට පුළුවන් වෙලා තියෙනවා.” මන්ත්‍රීවරයා මේ බව පැවසුවේ පොල්ගහවෙල ශ්‍රී ලංකා පොදුජන පෙරමුණේ බල මණ්ඩල රැස්වීමක් අමතමිනි.
“ශ්‍රී ලංකා පොදුජන පෙරමුණ කුරුණෑගල දිස්ත්‍රික්කය ලක්ෂ දෙකකට වැඩි ප්‍රමාණයකින් ජයග්‍රහණය කරනවා. හිටපු ජනාධිපති මහින්ද රාජපක්ෂ මහතා වැඩිම මනාප සංඛ්‍යාව වාර්තා කරයි. ශ්‍රී ලංකා පොදුජන පෙරමුණේ මන්ත්‍රීවරුන් 11 දෙනෙකු කුරුණෑගල දිස්ත්‍රික්කයෙන් පාර්ලිමේන්තුවට යයි. අපි ඕනෑම මැතිවරණයකට සූදානම්, “ඔහු වැඩිදුරටත් පැවසීය.
