ශ්රී ලංකා ක්රිකට් ආයතනයේ සභාපති ශම්මි සිල්වා සහ ජාතික ක්රීඩා කවුන්සිලයේ අධ්යක්ෂ සුදත් චන්ද්රසේකර යන මහත්වරුන් දෙපාර්ශවය අතර ඇති වූ නව පෙරළියක දී තමන්ට තර්ජන එල්ල වූ බව ක්රීඩා අමාත්ය රොෂාන් රණසිංහ ප්රකාශ කළා.
ක්රීඩා අමාත්යවරයා මෙම අදහස් පළ කළේ කොළඹ ඊයේ පැවති විශේෂ මාධ්ය හමුවකට එක්වෙමින්.
ශ්රී ලංකාවේ ක්රිකට් පරිපාලනය සම්බන්ධයෙන් දෙපාර්ශවය අතර මේ වන විට මතුව ඇති අර්බුදකාරී තත්ත්වය හේතුවෙන් ශම්මි සහ සුදත්ගෙන් එල්ල වන තර්ජන සම්බන්ධයෙන් තමන් දැනටමත් අපරාධ පරීක්ෂණ දෙපාර්තමේන්තුවට පැමිණිලි කර ඇති බවයි රණසිංහ කියා සිටියේ.
මේ රටේ දේශපාලන ඉතිහාසයේ කැබිනට් ඇමැතිවරයකුට තර්ජනය කළ පළමු අවස්ථාව මෙයයි.
“අපිට ඔයාගෙ පස්සෙන් එන්න පුළුවන්, නැත්තම් ඔයා අපි ගාවට එන්න ශම්මි සහ සුදත් තර්ජනාත්මකව කිව්වා. අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කිරීමෙන් පසු තමාගේ ආරක්ෂාව වැඩි කරන ලෙස ඔහු රජයෙන් සහ ආරක්ෂක අංශවලින් ඉල්ලා සිටියේය.
විධායක කමිටුවේ අනුමැතියකින් තොරව නොවැම්බර් 6, 7 සහ 9 යන දිනවල ජාත්යන්තර ක්රිකට් කවුන්සිලයට (ICC) දේශපාලන ලිපි තුනක් යවමින් ශ්රී ලංකා ක්රිකට් සභාපතිවරයා ICC බලධාරීන් නොමඟ යවා ඇත.
එය ශ්රී ලංකා ක්රිකට් ඉතිහාසයේ ඇති වූ විශාලතම කළු පැල්ලම වන අතර එය ක්රිකට් ඉතිහාසයේ සිදුවූ විශාලතම පාවාදීම බවද ක්රීඩා අමාත්යවරයා පැවසීය.
“පාර්ලිමේන්තුව කෝප් කමිටුව පත් කළේ ක්රිකට් හොරු කොටු කරන්නයි. නමුත් දැන් කෝප් කමිටුව තක්කඩි අල්ලලා චිත්රපට දර්ශනයක් වෙලා වගේ.” අමාත්යවරයා අවධාරණය කළේය.
ඉල්ලා අස්වන ලෙස තමාට කිසිවකුගෙන් උපදෙස් ලැබී නොමැති බවත්, එසේ නොමැතිව පක්ෂ මාරු කිරීමට හෝ විපක්ෂයේ අසුන් ගැනීමට තමාට අදහසක් නොමැති බවත්, ජාතික ක්රීඩා සංගම්වල දූෂණ මැඩලීම තම එකම අරමුණ බවත් රණසිංහ වැඩිදුරටත් පැවසීය.
