විවිධ ආගම්වලට අයත් පූජකවරුන් 56 දෙනෙකු මේ වනවිට විවිධ අපරාධ සම්බන්ධයෙන් සිර දඬුවම් විඳිමින් සිටින බව රාජ්‍ය අමාත්‍ය අනුරාධ ජයරත්න මහතා පවසයි.
පාර්ලිමේන්තු මන්ත්‍රී ඩලස් අලහපෙරුම මහතා විසින් අසන ලද වාචික ප්‍රශ්නයකට සභාවේදී පිළිතුරු දුන් රාජ්‍ය අමාත්‍ය අනුරාධ ජයරත්න කියා සිටියේ විවිධ අපරාධ සම්බන්ධයෙන් සිරගතව සිටින ආගම් හතරටම අයත් පූජකවරුන් සිටින බවයි.
“ළමයින්ට අතවර කිරීම සම්බන්ධයෙන් පූජ්‍ය පක්‍ෂ සාමාජිකයන් 19 දෙනෙකු වරදකරුවන් වී ඇති අතර ළමයින්ට අතවර කිරීම සම්බන්ධයෙන් සැකපිට හතර දෙනෙකු රඳවාගෙන සිටිනවා. 4ක් ස්ත්‍රී දූෂණ සම්බන්ධයෙන්ද, පස් දෙනෙක් මිනීමැරුම් සම්බන්ධයෙන්ද, තිදෙනෙකු මූල්‍ය අපරාධ සම්බන්ධයෙන්ද, තිදෙනෙකු නිධන් හෑරීම සම්බන්ධයෙන්ද සැකපිට අත්අඩංගුවට ගෙන ඇත. ඊට අමතරව බරපතල ලිංගික අපරාධ සම්බන්ධයෙන් දෙදෙනෙකු සහ බාලවයස්කාර දැරියකට අතවර කිරීම සම්බන්ධයෙන් දෙදෙනෙකු අත්අඩංගුවට ගෙන තිබෙනවා.
පාර්ලිමේන්තු මන්ත්‍රී අල්හපෙරුම මහතා ප්‍රකාශ කළේ මන්ත්‍රීවරුන්ට මෙන්ම ශ්‍රී ලංකාවේ පූජ්‍ය පක්‍ෂ සාමාජිකයන්ටද ගෞරවය අහිමි වන බවයි.
පූජ්‍ය පක්‍ෂය විනයගරුක කිරීමට ක්‍රමවේදයක් තිබිය යුතු බව ඔහු වැඩිදුරටත් පැවසීය.
“පාර්ලිමේන්තු සැසිවාරයේදී මන්ත්‍රීවරුන් කුණුහරුප පාවිච්චි කරනවා අපි දැක්කා. එහි ප්‍රතිඵලයක් ලෙස සාමාජිකයන් 225 දෙනාටම ජනතා ගෞරවය අහිමි වී ඇත. මේ රටේ පූජ්‍ය පක්‍ෂ සාමාජිකයන් අතර විනය ඇති නොකළහොත් ළඟදීම ඔවුන්ටත් එම ඉරණම අත්වේවි.” යැයිද අල්හපෙරුම මන්ත්‍රීවරයා පැවසීය.
