බණ්ඩාරනායක ජාත්‍යන්තර ගුවන්තොටුපළ හරහා ව්‍යාජ වීසා මත නීතිවිරෝධී සංක්‍රමණ වැළැක්වීම සඳහා ආරක්ෂිත සංක්‍රමණ ප්‍රවර්ධන ඒකකයක් කම්කරු හා විදේශ රැකියා අමාත්‍ය මනුෂ් නානායක්කාර මහතා විසින් ගුවන්තොටුපළ පිටත්වීමේ පර්යන්තයේ ස්ථාපිත කර තිබේ.
පුද්ගලයන් කිහිප දෙනෙකු ව්‍යාජ වීසා මත ඕමානය, මැලේසියාව සහ එක්සත් අරාබි එමීර් රාජ්‍ය වෙත පිටත්ව ගොස් ඇති බවත් එය බරපතල ගැටළු මතු කර ඇති බවත් අමාත්‍යවරයා පැවසීය.
නීතිවිරෝධී ගමන් ලියකියවිලි මත මගීන් ගමන් කිරීම වැළැක්වීම සඳහා ආරක්ෂක අමාත්‍යාංශයේ සහ මිනිස් ජාවාරම වැළැක්වීමේ ජාතික කාර්ය සාධක බලකායේ නිර්දේශ මත ආරක්ෂිත සංක්‍රමණ ඒකකය ස්ථාපිත කළ බව ඔහු පැවසීය.
ආරක්ෂිත සංක්‍රමණ ප්‍රවර්ධන ඒකකයට ශ්‍රී ලංකා විදේශ සේවා නියුක්ති කාර්යාංශයේ, අපරාධ පරීක්ෂණ දෙපාර්තමේන්තුවේ, ආගමන හා විගමන දෙපාර්තමේන්තුවේ සහ රාජ්‍ය බුද්ධි සේවයේ නිලධාරීන් ඇතුළත් වේ.
එය නියමු ව්‍යාපෘතියක් ලෙස මාස තුනක කාලයක් ක්‍රියාත්මක වන අතර ඉන් පසුව තවදුරටත් වැඩිදියුණු කරන බව අමාත්‍ය නානායක්කාර මහතා පැවසීය.
ගුවන් තොටුපළ සහ ගුවන් සේවා සමාගමේ සභාපති මේජර් ජෙනරාල් (විශ්‍රාමික) ජී.ඒ. චන්ද්‍රසිරි, ගුවන් තොටුපළ කළමනාකරණ ප්‍රධානී එච්. හෙට්ටිආරච්චි, ශ්‍රී ලංකා විදේශ සේවා නියුක්ති කාර්යාංශයේ සභාපති හිල්මි අසීස්, සාමාන්‍යාධිකාරී ප්‍රියන්ත සේනානායක යන මහත්වරුන් ඇතුළු ජ්‍යෙෂ්ඨ පොලිස් සහ අපරාධ පරීක්ෂණ දෙපාර්තමේන්තුවේ නිලධාරීන් රැසක් මෙම අවස්ථාවට එක්ව සිටියහ.
