රැඳවියන් අතර පැතිර යන බෝවන රෝගයක් හේතුවෙන් සති දෙකක කාලයක් වසා දමා තිබූ වවුනියාව රිමාන්ඩ් බන්ධනාගාරය ඊයේ (07) යළි විවෘත කරන බව බන්ධනාගාර දෙපාර්තමේන්තුව පවසයි.
බන්ධනාගාර මාධ්‍ය ප්‍රකාශක චන්දන ඒකනායක මහතා පැවසුවේ, කලාපීය වසංගත රෝග විද්‍යාඥවරයාගේ උපදෙස් මත මෙම තීරණය ගෙන ඇති බවයි.
බන්ධනාගාර තාවකාලිකව වසා දැමීම සරම්ප ව්‍යාප්තියට එරෙහි පූර්වාරක්ෂාවක් බව ඔහු පැවසීය.
“සෞඛ්‍ය බලධාරීන්ගේ උපදෙස් මත ජූලි 25 සිට රැඳවියන් වෙත පැමිණීම සීමා කර ඇත,” ඔහු පැවසීය.
ඒ අනුව එම සීමාවන් අවසන් වූ අතර බන්ධනාගාරය ඊයේ (07) යළි විවෘත කෙරුණා.
එමෙන්ම වයස අවුරුදු 21ට වැඩි සියලුම සිරකරුවන්ට සරම්ප, කම්මුල්ගාය සහ රුබෙල්ලා එන්නත් ලබාදීමට සෞඛ්‍ය වෛද්‍ය නිලධාරීවරයා (MOH) කඩිනම් පියවර ගෙන ඇත.
දැනට වවුනියාව බන්ධනාගාරයේ රැඳවියන් 400 ක් සිටින අතර නිලධාරීන් 85 දෙනෙකුගෙන් යුත් කාර්ය මණ්ඩලයක් සිටී.
