ඉදිරි මහ මැතිවරණයේදී ශ්‍රී ලංකා පොදුජන පෙරමුණ ඇතුළු සන්ධානයෙන් භික්ෂූන් වහන්සේලාට අපේක්ෂකත්වය ලබා නොදීමට තීරණය කර ඇති බව ජනාධිපතිවරයාගේ පාර්ශ්වයෙන් මහනාහිමිවරුන්ට දැනුම්දී ඇති බව වාර්තාවේ.
ජනාධිපති ගෝඨාභය රාජපක්‍ෂ මහතා මහනාහිමිවරුන් මුණගැසුනු අවස්ථාවේදී අමාත්‍ය කෙහෙලිය රඹුක්වැල්ල මහතා විසින් මේ බව දැනුම්දී ඇත.
ඉදිරි මහ මැතිවරණයේදී භික්ෂූන් වහන්සේලාට අපේක්ෂකත්වය ලබා නොදෙන ලෙස අස්ගිරි පාර්ශ්වයේ මහා නායක හිමියන් සහ කාරක සංඝ සභාවේ නායක හිමිවරුන් විසින් ජනාධිපතිවරයාට ප්‍රකාශ කර ඇති අතර, එහිදී මේ බව සඳහන් කර තිබේ.
අස්ගිරි මහානායක පූජ්‍ය ආචාර්ය වරකාගොඩ ඥානරතන හිමියන් ඇතුළු සංඝරත්නය සහ ජනාධිපතිවරයා අතර පැවති මෙම සාකච්ඡාවේදී භික්ෂූන් වහන්සේලාට අපේක්ෂකත්වය ලබාදීම සම්බන්ධයෙන් සහ භික්ෂූන් වහන්සේලා මන්ත්‍රීවරුන් ලෙස පත්වීමෙන් පසුව උන්වහන්සේලාගේ ක්‍රියාකලාපය සම්බන්ධයෙන් දීර්ඝ වශයෙන් සාකච්ඡා වී ඇති අතර ඉදිරි මහ මැතිවරණයේදී සුදුසු පුද්ගලයන්ට පමණක් අපේක්‍ෂකත්වයන් ලබාදීමට කටයුතු කරන ලෙසටත් නායක හිමිවරුන් ජනාධිපතිවරයාට ප්‍රකාශ කර තිබේ.
එහිදී කෙහෙළිය රඹුක්වැල්ල අමාත්‍යවරයා විසින් වැඩිදුරටත් දැනුම්දී ඇත්තේ, ශ්‍රී ලංකා පොදුජන පෙරමුණ පාර්ශ්වයෙන් එලෙස භික්ෂූන් වහන්සේලාට අපේක්ෂකත්වය නොදීමට තීරණය කර ඇති බවත්, අනිකුත් පක්‍ෂ සම්බන්ධයෙන් ප්‍රකාශයක් කිරීමට නොහැකි බවත්ය. එම සාකච්ඡාවට ජනාධිපතිවරයා සමග මහින්දානන්ද අලුත්ගමගේ, කෙහෙලිය රඹුක්වැල්ල, එස්.බී. දිසානායක, ආනන්ද අලුත්ගමගේ, අනුරාධ ජයරත්න යන මහත්වරුන්ද සහභාගි වී තිබේ.
