යාපනය, කුරුණෑගල, පුත්තලම, ත්‍රිකුණාමලය සහ රත්නපුර දිස්ත්රික්ක පහක පුද්ගලයන් ලක්ෂයකට ආසන්න පිරිසක් නිසි පානීය ජලය නොමැතිව පීඩාවට පත්ව සිටින බව ආපදා කළමනාකරණ මධ්‍යස්ථානය පවසයි.
රට පුරා සිටින ගොවීන් 50,000 කගේ ජීවනෝපාය ද ජලය නොමැතිකම හේතුවෙන් පීඩාවට පත්ව ඇති බව කෘෂිකර්ම අමාත්‍ය මහින්ද අමරවීර මහතා පවසයි. වියළි කාලගුණය හේතුවෙන් වගා හානි ඇස්තමේන්තු කරන ලෙස අමාත්‍යවරයා අදාළ නිලධාරීන්ට නියෝග කළේය. විදුලිබල හා බලශක්ති අමාත්‍ය කංචන විජේසේකර මහතාගේ පෞද්ගලික නිවසට ගොවීන් පැමිණීමට නියමිතව තිබූ බැවින් මාතර නගරයේ ආරක්ෂාව තර කර තිබුණි.
විල්පත්තු ජාතික වනෝද්‍යානයේ සතුන් භාවිත කරන කුඩා ඇළ දොළ 106ක් වියළී යාමෙන් සතුන් ද දීර්ඝ වියළි කාලගුණයට ගොදුරු වී ඇත.
ප්‍රදේශයේ සතුන් පිපාසයෙන් පෙළෙන බවයි වනෝද්‍යාන බලධාරීන් උපුටා දක්වමින් අප වාර්තාකරුවන් සඳහන් කළේ.
උඩවලව, චන්ද්‍රිකා වැව, මාදුරුඔය, කලාවේර ඇතුළු ප්‍රධාන වැව් සහ ජලාශ සිඳී යන බව පැවැසේ.
මේ අතර ඉදිරි දිනවලදී බස්නාහිර, සබරගමුව පළාත්වලත් ගාල්ල, මාතර, මහනුවර සහ නුවරඑළිය දිස්ත්‍රික්කවලත් වැසි ඇති විය හැකි බව කාලගුණ විද්‍යා දෙපාර්තමේන්තුව පවසයි.
