පාස්කු ඉරිදා බෝම්බ ප්‍රහාරය සම්බන්ධයෙන් විමර්ශනය කළ විශ්‍රාමලත් විනිසුරු A.N.J ද අල්විස් මහතාගේ ප්‍රධානත්වයෙන් යුත් කමිටු වාර්තාව දේශපාලන අරමුණක් මත සිදු කළ එකක් බැවින් රජය එය පිළිනොගන්නා බව අමාත්‍ය විජිත හේරත් මහතා පවසයි.
ජාතික ජන බලවේගයේ (NPP) විශ්‍රාමික පොලිස් සංසදයට එක්වීමෙන් පසුව මෙම කමිටුව ඉලක්ක කළේ හිටපු ජ්‍යෙෂ්ඨ නියෝජ්‍ය පොලිස්පති (DIG) රවී සෙනෙවිරත්න සහ හිටපු CID අධ්‍යක්ෂ ශානි අබේසේකර පමණක් බව අමාත්‍ය මණ්ඩල තීරණ දැනුම් දීමේ සතිපතා මාධ්‍ය හමුවේදී ඔහු පැවසීය.
NPP හි විශ්‍රාමික පොලිස් සංසදය 2024 ජුනි 09 වන දින පිහිටුවන ලද බවත්, විශ්‍රාමික පොලිස් සංසදය පිහිටුවා දින තුනකට පසුව, 2024 ජුනි 12 වන දින එම කමිටුව පත් කරන ලද බවත් ඔහු පැවසීය.
මෙම කමිටුව මාස තුනක් ඇතුළත එනම් සැප්තැම්බර් 15 වැනි දින ජනාධිපතිවරණයට පෙර සිය වාර්තාව ඉදිරිපත් කිරීමට බලාපොරොත්තු වන බවද ඇමැතිවරයා කීය.
