නීතිවිරෝධී චීන සන්නාමය සහිත දුම්වැටි තොගයක් කොළඹ ප්‍රදේශයේදී බෙදාහරිමින් සිටියදී අත්අඩංගුවට ගත් චීන ජාතිකයෙකුට කොටුව මහේස්ත්‍රාත්වරයා විසින් ඊයේ රුපියල් ලක්ෂ 10ක දඩයක් නියම කළා.
ශ්‍රී ලංකාව තුළ විකිණීම සහ පරිභෝජනය සම්පූර්ණයෙන්ම තහනම් චීන සන්නාමය සහිත දුම්වැටි තොගයක් බෙදා හැරීම සම්බන්ධයෙන් අත්අඩංගුවට ගත් විදේශිකයා කොල්ලුපිටිය පොලිසියට ඉදිරිපත් කළ අවස්ථාවේදී කොටුව මහේස්ත්‍රාත් තිළිණ ගමගේ මහතා මෙම දඩ නියම කළේය.
කොල්ලුපිටිය පොලිසියට අනුයුක්ත නිලධාරීන් දෙදෙනෙකු ලද තොරතුරක් මත මෙම චීන ජාතිකයා අත්අඩංගුවට ගෙන ඇති අතර එහිදී දුම්වැටි කූරු 6400 ක් සොයාගෙන ඇති අතර එහි වටිනාකම රුපියල් 760,000 කි.
කොල්ලුපිටිය පොලිසියේ පොලිස් පරීක්ෂක එස්.විශ්ව, උප පොලිස් පරීක්ෂක ඩබ්ලිව්.පෙරේරා, කොස්තාපල් චානක (83997) යන නිලධාරීහු මෙම සොයාගැනීම සිදු කළහ. අත්අඩංගුවට ගත් දුම්වැටි රාජසන්තක කරන ලෙස මහේස්ත්‍රාත්වරයා නියෝග කළේය.
මේ අතර, ගාල්ල – මාගල්ල ප්‍රදේශයේදී රුපියල් ලක්ෂ 13කට අධික වටිනාකමකින් යුත් නීතිවිරෝධී දුම්වැටි තොගයක් ළඟ තබාගෙන සිටි පුද්ගලයෙකු පොලිස් විශේෂ කාර්ය බලකායේ නිලධාරීන් විසින් අත්අඩංගුවට ගෙන තිබෙනවා.
රත්ගම පොලිස් විශේෂ කාර්ය බළකා කඳවුරට අනුයුක්තව අනුයුක්ත පොලිස් නිලධාරීන් විසින් මෙම අනාවරණය කර ඇති අතර එහිදී ආනයනය කරන ලද වෙළෙඳනාම රැසකට අයත් දුම්වැටි කූරු 11,600ක් අත්අඩංගුවට ගෙන ඇත. නීතිවිරෝධී මත්කුඩු තොගයේ වටිනාකම රුපියල් 1,392,000 කි.
පොලිස් විශේෂ කාර්ය බළකායේ රත්ගම කඳවුරේ ස්ථානාධිපති පොලිස් පරීක්ෂක එම් බී එම් එස් ජේ බණ්ඩාර මහතා ඇතුළු කණ්ඩායමක් මෙම වැටලීම සිදු කළහ.
52 හැවිරිදි සැකකරු සහ දුම්වැටි තොගය වැඩිදුර පරීක්ෂණ සඳහා ගාල්ල පොලිසිය වෙත භාරදී තිබෙනවා.
