රජයේ මිල පාලන ඖෂධ අධික මිලට අලෙවි කරමින් ආන්දෝලනයට තුඩු දුන් කොළඹ ප්‍රමුඛ පෙළේ පෞද්ගලික රෝහලක් පැමිණිල්ලේ පාර්ශවය ඇතුළු රාජ්‍ය නිලධාරීන් හමුවේ නඩුව ඊයේ කැඳවීමට නියමිතව තිබියදී කලින්ම වරද පිළිගෙන ඇතැයි වාර්තා වේ.
උපරිම සිල්ලර මිලට ලැයිස්තුගත කර ඇති ඖෂධ වර්ග 11ක් වැඩි මිලට අලෙවි කිරීම සම්බන්ධයෙන් ජාතික ඖෂධ නියාමන අධිකාරිය (NMRA) ආසිරි හොස්පිට්ල් හෝල්ඩිංග්ස් පීඑල්සී හි අධ්‍යක්ෂවරුන් අට දෙනෙකුට සහ තවත් නිලධාරීන් තිදෙනෙකුට එරෙහිව චෝදනා ගොනු කළ බව NMRA හි ප්‍රකාශකයෙක් පැවසීය.
පසුගිය වසරේ මැද භාගයේ සනත් කුමාර අතුකෝරල නමැති රෝගියෙකු විසින් කරන ලද පැමිණිල්ලකට අනුව ක්‍රියාත්මක වන NMRA ආයතනය ඒ සම්බන්ධයෙන් පරීක්ෂණයක් පවත්වමින් දෙසැම්බර් මස අවසන් සතියේ මාලිගාකන්ද මහේස්ත්‍රාත් අධිකරණයේ නඩුවක් ගොනු කර තිබුණි. එමෙන්ම ජනවාරි 24 වැනිදා අධිකරණයේ පෙනී සිටින ලෙස රෝහල් බලධාරීන්ට සිතාසි නිකුත් කර තිබුණි.
කෙසේ වෙතත්, පැමිණිලිකරු සිය පෞද්ගලික නීතීඥයින් මෙන්ම NMRA ආහාර හා ඖෂධ පරීක්ෂණ ඒකකයේ නිලධාරීන් සමඟ ඊයේ අධිකරණයට ගිය අවස්ථාවේදී නියමිත පරිදි නඩුව කැඳවා තිබුණේ නැහැ.
රෙජිස්ට්‍රාර් කාර්යාලයෙන් කළ විමසීමකදී පාර්ශවයට දන්වා ඇත්තේ ජනවාරි 17 වැනිදා නඩුව කල්තියා කැඳවූ බවත් විත්තිකාර රෝහල හිටපු පාර්ශ්වයෙන් මෝසමක් ගොනු කර වැඩබලන මහේස්ත්‍රාත්වරයකු ඉදිරියේ වරද පිළිගත් බවත්ය. ඔවුන්ට එරෙහිව ගොනුකර තිබූ චෝදනාවලට අදාළව රෝහලට රුපියල් 25,000ක දඩයක් නියම කර තිබුණා.
අදහස් දැක්වීම සඳහා ආසිරි හොස්පිට්ල් හෝල්ඩිංග්ස් පීඑල්සී ඇමතීමට ගත් උත්සාහය නිෂ්ඵල විය.
2023 ජූනි 15 දින සිට ක්‍රියාත්මක වන පරිදි උපරිම සිල්ලර මිල 16% කින් අඩු කර ඇති අත්‍යාවශ්‍ය සහ බහුලව භාවිතා වන ඖෂධ වර්ග 65 ක ලැයිස්තුවක් කැබිනට් අනුමැතිය සහිතව සෞඛ්‍ය අමාත්‍යාංශය විසින් ප්‍රසිද්ධියට පත් කරන ලදී.
