බෙල්ලන්විල ඇසළ පෙරහර වැනි ආගමික හා සංස්කෘතික උත්සව ශ්රී ලංකාවේ ආගමික හා සංස්කෘතික උරුමය පරම්පරාවෙන් පරම්පරාවට සුරැකීමට සහ අනාගත පරපුර වෙත එය රැගෙන යාමට වැදගත් කාර්යභාරයක් ඉටු කරන බව අග්රාමාත්ය ආචාර්ය හරිනි අමරසූරිය මහත්මිය පැවසුවාය.
අග්රාමාත්යවරිය මේ බව ප්රකාශ කළේ බෙල්ලන්විල රජමහා විහාරස්ථානයේදී පැවති 76 වැනි වාර්ෂික බෙල්ලන්විල ඇසළ පෙරහරට සහභාගී වෙමිනි.
බෙල්ලන්විල රජමහා විහාරස්ථානය ශ්රී ලංකාවේ බෞද්ධ උරුමය තුළ මෙන්ම මෙරට සංස්කෘතික හා කලා උරුමය සුරැකීමේදීද වැදගත් ස්ථානයක් හිමි කරගෙන ඇති බව අග්රාමාත්යවරිය සඳහන් කළාය.
ඇය පෙන්වා දුන්නේ ඇසළ පෙරහරක් යනු හුදෙක් වර්ණවත් සංස්කෘතික පෙරහැරක් නොව, ආගමික විශ්වාස, සාම්ප්රදායික නර්තන, සංගීතය, කලා ශිල්ප සහ ප්රජා සහභාගීත්වය එක් කරන ජීවමාන උරුමයක් බවයි.
එවැනි උරුමයන් සුරැකීම අතීතය ආරක්ෂා කිරීම පමණක් නොවන බවත්, අනාගත පරපුරට තම සංස්කෘතික අනන්යතාව අවබෝධ කරගෙන එය ඉදිරියට රැගෙන යාමට අවස්ථාව සලසාදීමක් බවත් ඇය අවධාරණය කළාය.
දරුවන් සහ තරුණයන් තුළ සම්ප්රදායන් හා සංස්කෘතික උරුමයන් කෙරෙහි ගෞරවයක් ඇති කිරීමේ වැදගත්කම පෙන්වා දුන් අග්රාමාත්යවරිය, කරුණාව, මෛත්රිය, අවිහිංසාව සහ සහජීවනය වැනි බුදුදහමින් උගන්වන වටිනාකම් දෛනික ජීවිතයට එක් කරගැනීමේ අවශ්යතාවද අවධාරණය කළාය.
සාම්ප්රදායික කලාකරුවන්ගේ දැනුම, කුසලතා සහ සම්ප්රදායන් අනාගත පරපුර වෙත සම්ප්රේෂණය කිරීම සඳහා අවශ්ය සහාය ලබාදීම රජයේ වගකීමක් බවද ඇය සඳහන් කළාය.
බෙල්ලන්විල ඇසළ පෙරහර සාර්ථකව පැවැත්වීමට දායක වූ විහාරාධිපති ස්වාමීන් වහන්සේ ප්රමුඛ මහා සංඝරත්නය, දායක සභාව, සංවිධායක කමිටුව, සාම්ප්රදායික නර්තන ශිල්පීන්, බෙර වාදකයන් සහ සියලු කලාකරුවන් වෙත අග්රාමාත්යවරිය සිය ස්තූතිය පළ කළාය.
මෙම අවස්ථාවට සහභාගී වූ විදේශ කටයුතු, විදේශ රැකියා සහ සංචාරක අමාත්ය විජිත හේරත් මහතා පැවසුවේ පෙරහර ශක්තිමත් කරමින් එය ඉදිරියට රැගෙන යාමටත්, ශ්රී ලංකාවේ බෞද්ධ දර්ශනය හා සංස්කෘතිය ප්රවර්ධනය කිරීමටත් සියලු දෙනාට වගකීමක් ඇති බවයි.
මෙම කටයුතු සඳහා රජය උපරිම සහාය ලබාදීමට සූදානම් බවද ඔහු පැවසීය. පෙරහර ආගමික හා ජාතික සමගිය ප්රවර්ධනය කිරීමට මෙන්ම එක් ප්රජාවක් ලෙස ඉදිරියට යාමටද වැදගත් දායකත්වයක් ලබාදෙන බව අමාත්යවරයා වැඩිදුරටත් සඳහන් කළේය.
බෙල්ලන්විල රජමහා විහාරයේ විහාරාධිපති ස්වාමීන් වහන්සේ ඇතුළු මහා සංඝරත්නය, අමාත්ය විජිත හේරත් මහතා, මහජන නියෝජිතයන්, රාජ්ය නිලධාරීන් සහ බැතිමතුන් ඇතුළු පිරිසක් මෙම අවස්ථාවට එක්ව සිටියහ.
