පාසල් නිවාඩු සමයේ සරුංගල් යැවීම හේතුවෙන් සිදුවන අනතුරු ඉහළ යාමත් සමඟ දරුවන්ගේ ආරක්ෂාව පිළිබඳ දැඩි අවධානයක් යොමු කරන ලෙස සෞඛ්ය අමාත්යාංශය දෙමාපියන්ගෙන් සහ මහජනතාවගෙන් ඉල්ලා තිබේ.
වත්මන් වියළි කාලගුණ තත්ත්වය හේතුවෙන් දරුවන් අතර සරුංගල් යැවීමේ ජනප්රියත්වය ඉහළ ගොස් ඇති නමුත්, නොසැලකිලිමත් ලෙස සරුංගල් යැවීම හේතුවෙන් නිරන්තරයෙන් තුවාල සිදුවන අතර ඇතැම් අවස්ථාවල ජීවිතයට පවා තර්ජනයක් එල්ල වන අනතුරු සිදුවන බව රිජ්වේ ආර්යා ළමා රෝහලේ වැඩබලන අධ්යක්ෂ විශේෂඥ වෛද්ය ප්රදීප් රත්නසේකර මහතා පැවසීය.
“සරුංගල් යැවීම විනෝදජනක ක්රියාකාරකමක්. නමුත් අනාරක්ෂිත ක්රම භාවිත කිරීමෙන් බරපතළ අනතුරු සිදුවිය හැකියි. දරුවන්ගේ ආරක්ෂාව පිළිබඳව දෙමාපියන් සහ වැඩිහිටියන් නිරන්තර අවධානයෙන් සිටිය යුතුයි,” යනුවෙන් වෛද්යවරයා අවධාරණය කළේය.
ඔහු පෙන්වා දුන් ප්රධාන අවදානම් අතර:
- ගැටීම් සහ ඇදවැටීම්: කණ්ඩායම් වශයෙන් සරුංගල් යැවීමේදී දරුවන් එකිනෙකාගේ ගැටීමෙන් ඇදවැටීමට ඉඩ ඇති අතර, වහල මත හෝ උස් ස්ථානවල සිට සරුංගල් යැවීම බරපතළ අනතුරු ඇති කළ හැකිය.
- විදුලි සැර වැදීම: සරුංගල් නූල් අධි වෝල්ටීයතා විදුලි රැහැන්වල ගැටීමෙන් විදුලිය සම්ප්රේෂණය වී විදුලි සැර වැදීම සහ බරපතළ පිළිස්සුම් ඇතිවිය හැකිය.
- බරපතළ පිළිස්සුම්: සරුංගල් නූල් හරහා සිදුවන විදුලි අනතුරු හේතුවෙන් අත්, බාහු සහ පපුවේ පටක, රුධිර නාල සහ ස්නායු සදාකාලිකව හානි වූ අවස්ථා පිළිබඳ ශල්ය වෛද්යවරුන් වාර්තා කර තිබේ. ඇතැම් අවස්ථාවල හානියට පත් ශරීර කොටස් ඉවත් කිරීමට පවා සිදුවිය හැකිය.
- ජීවිත හානි: සරුංගල් නූලක් අධි වෝල්ටීයතා විදුලි රැහැනක් සමඟ සම්බන්ධ වුවහොත් එම නූල හරහා විදුලිය ගමන් කිරීමෙන් ක්ෂණිකව මරණය පවා සිදුවිය හැකිය.
දරුවන්ගේ විනෝදය මෙන්ම ඔවුන්ගේ ආරක්ෂාවද සමාන වැදගත්කමකින් සැලකිය යුතු බව රෝහල් අධ්යක්ෂවරයා අවධාරණය කළේය.
අනතුරුදායක තත්ත්වයන් වළක්වා ගැනීම සඳහා දෙමාපියන්, භාරකරුවන් සහ සමස්ත සමාජයම වගකීමෙන් හා අවබෝධයෙන් කටයුතු කරන ලෙසද ඔහු ඉල්ලා සිටියේය.
