2023 වසරේ සිදුවූ නායයෑමකින් නිවාස අහිමි වී වසර තුනහමාරකට ආසන්න කාලයක් අනාරක්ෂිත තත්ත්වයන් යටතේ ජීවත් වූ පූනාගල, කබරගල පවුල් 50ක් සඳහා ඉදිකළ “නවෝදයපුරම්” නිවාස ව්යාපෘතිය ජනාධිපති අනුර කුමාර දිසානායක මහතා විසින් භාර දෙනු ලැබීය.
ශ්රී ලංකා යුද හමුදා ඉංජිනේරු බළකායේ සක්රීය දායකත්වයෙන් ඉදිකළ මෙම නිවාස ව්යාපෘතිය මලයගම් ප්රජාවේ ජීවන තත්ත්වය නඟාසිටුවීම සඳහා ක්රියාත්මක කළ වැදගත් වැඩසටහනක් ලෙස ඇගයීමට ලක් විය.
උත්සවය අමතමින් ජනාධිපතිවරයා අවධාරණය කළේ මලයගම් ජනතාව ශ්රී ලංකාවේ සමාන පුරවැසියන් වන අතර, ඔවුන්ට පූර්ණ අයිතිවාසිකම් සහ ගෞරවය හිමිවිය යුතු බවයි.
පරම්පරා ගණනාවක් පුරා ඔවුන් අත්විඳි දුෂ්කරතා ඉදිරි පරම්පරාවලටද උරුම කර දීම අසාධාරණ බව පැවසූ ජනාධිපතිවරයා, රටේ ආර්ථිකයට දායක වන සියලු පුරවැසියන්ගේ ජීවන තත්ත්වය වැඩිදියුණු කිරීම සඳහා තම රජය කැපවී සිටින බව ප්රකාශ කළේය.
යුද සමයේදී රට හැර ගොස් මේ වන විට ඉන්දියාවේ ජීවත් වන ශ්රී ලාංකිකයන්ට යළි මෙරටට පැමිණීමට බාධා වන කරුණු ඉවත් කිරීමට කැබිනට් මණ්ඩලය මෑතකදී තීරණය කළ බවද ජනාධිපතිවරයා සිහිපත් කළේය.
ඉදිරි අයවැයෙන් නිවාස ඉදිකිරීමේ ව්යාපෘති සඳහා ප්රමුඛතාව ලබාදී ඇති බවත්, ඉදිරියේදී වතු සමාගම් සමඟ ඇතිකර ගන්නා ගිවිසුම්වලට මලයගම් ප්රජාවේ අයිතිවාසිකම් ආරක්ෂා කිරීමේ විධිවිධාන ඇතුළත් කරන බවත් ඔහු සඳහන් කළේය.
පරිසර ආරක්ෂාවේ වැදගත්කම අවධාරණය කරමින් ජනාධිපති දිසානායක මහතා මධ්යම කඳුකරය ආරක්ෂා කිරීමේ අවශ්යතාව පෙන්වා දුන්නේය.
මධ්යම කඳුකරය “රටේ හදවත” ලෙස හැඳින්වූ ජනාධිපතිවරයා, එම කලාපය ආරක්ෂා කිරීම සඳහා වගකිව යුතු සියලු ආයතනවල වගකීම් ඒකාබද්ධ කරමින් පුළුල් බලතල සහිත මධ්යම කඳුකර ආරක්ෂණ අධිකාරියක් ස්ථාපිත කිරීමට නීති සම්පාදනයක් මේ වසර අවසන් වීමට පෙර හෝ ලබන වසරේ මුල් භාගයේදී පාර්ලිමේන්තුවට ඉදිරිපත් කරන බවද ප්රකාශ කළේය.
අනාගත පරම්පරාව වෙනුවෙන් මධ්යම කඳුකරය යළි ප්රතිසංස්කරණය කර ආරක්ෂා කිරීමේ ජාතික වගකීමට එක්වන ලෙසද ඔහු සියලු පුරවැසියන්ගෙන් ඉල්ලා සිටියේය.
මලයගම් ප්රජාව නඟාසිටුවීමේ වැදගත් සන්ධිස්ථානයක් ලෙස “නවෝදයපුරම්” නිවාස ව්යාපෘතිය හැඳින්වූ ජනාධිපතිවරයා, එය ක්රියාත්මක කිරීමට දායක වූ සියලු පාර්ශ්ව වෙත සිය ස්තූතිය පළ කළේය.
විශේෂයෙන්ම ඉදිකිරීම් ක්රියාවලිය පුරා දැක්වූ ප්රශංසනීය දායකත්වය වෙනුවෙන් ශ්රී ලංකා යුද හමුදා ඉංජිනේරු බළකායටද ජනාධිපතිවරයා සිය විශේෂ ස්තූතිය පළ කළේය.
