ශ්‍රී ලංකා මහ බැංකුව (CBSL) විසින් මෙරට ක්‍රියාත්මක වීම තහනම් කරන ලද පිරමිඩ යෝජනාක්‍රම ලැයිස්තුවට ‘මැක්ස් ඇප් මීඩියා’ (Max App Media Ltd.) සහ ඊට අනුබද්ධ සමාගම් ඇතුළත් කිරීමත් සමඟ එම ලැයිස්තුවේ ඇති සමස්ත ආයතන සංඛ්‍යාව 27 දක්වා ඉහළ ගොස් තිබේ.
මහ බැංකුව විසින් අද (28) නිකුත් කරන ලද නිවේදනයක දැක්වෙන්නේ, ‘මැක්ස් ඇප් මීඩියා’ (Max App Media Ltd.) මෙන්ම ඊට අනුබද්ධිත ‘මැක්ස් එල්කේ’ (Max LK (Pvt) Ltd.) සහ ‘මැක්ස් මීඩියා ලංකා’ (Max Media Lanka (Pvt) Ltd.) යන සමාගම් නීතිවිරෝධී පිරමිඩ යෝජනාක්‍රම මෙහෙයවීම, ප්‍රවර්ධනය කිරීම සහ ඊට සම්බන්ධ වී කටයුතු කර ඇති බව විමර්ශනවලදී තහවුරු වී ඇති බවයි.
මෙම තීරණය ගනු ලැබ ඇත්තේ සංශෝධිත 1988 අංක 30 දරන බැංකු පනතේ 83(ඇ) වගන්තිය යටතේ පැවරී ඇති බලතල ප්‍රකාරවය.
තහනම් ලැයිස්තුවට එක්වූ අලුත් සමාගම්
ඒ අනුව, අලුතින් හඳුනාගත් මෙම සමාගම් ත්‍රිත්වයද මහ බැංකුව මඟින් ප්‍රකාශයට පත් කර ඇති තහනම් පිරමිඩ යෝජනාක්‍රම ලැයිස්තුවට එක් කර ඇති අතර, මෙරට ක්‍රියාත්මක වූ එවැනි තහනම් ආයතන සහ ජංගම යෙදුම් (Apps) සංඛ්‍යාව 27ක් දක්වා ඉහළ ගොස් ඇත.
මීට පෙර මහ බැංකුව විසින් තහනම් කරනු ලැබූ ආයතන සහ යෙදුම් රැසක්ද මෙම ලැයිස්තුවට ඇතුළත් වේ:
ටියැන්ස් ලංකා හෙල්ත් කෙයාර් පුද්ගලික සමාගම (Tiens Lanka Health Care)
බෙස්ට් ලයිෆ් ඉන්ටර්නැෂනල් පුද්ගලික සමාගම (Best Life International)
ස්පෝර්ට් චේන් (Sport Chain)
ඔන්මැක්ස් ඩීටී (OnmaxDT)
එම්ටීඑෆ්ඊ (MTFE)
ෆාස්ට්වින් පුද්ගලික සමාගම (Fastwin)
කියුනෙට් / ක්වෙස්ට්නෙට් (Qnet / Questnet)
ලෙජර් බ්ලොක් (Ledger Block)
බීකොයින් ඇප් (Beecoin App)
ටීඑම් ඇප් (TM App)
බැංකු පනත ප්‍රකාරව තහනම් කරන ලද මෙම සියලු ආයතන සහ යෙදුම් පිළිබඳ යාවත්කාලීන කළ ලැයිස්තුව මහ බැංකුවේ මූල්‍ය පාරිභෝගික සබඳතා දෙපාර්තමේන්තුව (Financial Consumer Relations Department) විසින් ප්‍රසිද්ධ දැන්වීමක් මඟින් මහජනතාවගේ දැනගැනීම පිණිස මේ වන විට ප්‍රකාශයට පත් කර ඇත. මෙවැනි තහනම් මූල්‍ය යෝජනාක්‍රමවල මුදල් ආයෝජනය කිරීමෙන් වළකින ලෙසද මහ බැංකුව මහජනතාවගෙන් දිගින් දිගටම ඉල්ලා සිටියි.
