මැදපෙරදිග කලාපයේ ආතතීන් සහ ගැටුම් උත්සන්න වෙමින් පවතින පසුබිමක, හමුදා සහ ආරක්ෂක සහයෝගීතාව ශක්තිමත් කිරීම අරමුණු කරගනිමින් සෞදි අරාබිය, පාකිස්තානය සහ තුර්කිය ත්රෛපාර්ශ්වික ආරක්ෂක ගිවිසුමකට අත්සන් තබා තිබේ.
මක්කමදී අත්සන් කළ මෙම ගිවිසුමට සෞදි ඔටුන්න හිමි කුමරු මොහොමඩ් බින් සල්මාන්, තුර්කි ජනාධිපති රිසෙප් තායිප් එර්ඩොගන් සහ පාකිස්තාන අග්රාමාත්ය ෂෙහ්බාස් ෂරීෆ් අත්සන් තබා ඇත.
ගිවිසුමට අනුව රටවල් තුනෙන් ඕනෑම රටකට එල්ල වන සන්නද්ධ ප්රහාරයක්, රටවල් තුනටම එල්ල වූ ප්රහාරයක් ලෙස සලකනු ඇත.
ඒකාබද්ධ ප්රකාශයක සඳහන් කර ඇත්තේ ඒකාබද්ධ වැළැක්වීමේ හැකියාව ශක්තිමත් කිරීම, ආරක්ෂක සහයෝගීතාව පුළුල් කිරීම, හමුදා සම්බන්ධීකරණය වැඩිදියුණු කිරීම, බුද්ධි තොරතුරු හුවමාරු කර ගැනීම සහ ත්රස්තවාදයට එරෙහි ක්රියාමාර්ග ශක්තිමත් කිරීම ගිවිසුමේ ප්රධාන අරමුණු බවයි.
මෙම ගිවිසුම ආරක්ෂක ස්වභාවයකින් යුක්ත බවත්, නව හමුදා කණ්ඩායමක් පිහිටුවීම හෝ කිසියම් නිශ්චිත රටක් ඉලක්ක කර ගැනීම එහි අරමුණ නොවන බවත් රටවල් තුන අවධාරණය කර තිබේ.
කලාපීය ගැටුම් සහ ආරක්ෂක අවදානම් හේතුවෙන් මැදපෙරදිග අස්ථාවරත්වය ඉහළ යමින් පවතින අවස්ථාවක මෙම ගිවිසුම අත්සන් කර තිබීම විශේෂත්වයකි.
විශ්ලේෂකයන් පෙන්වා දෙන්නේ න්යෂ්ටික අවි සහිත පාකිස්තානය සහ නේටෝ සාමාජික තුර්කිය සමඟ සෞදි අරාබිය එක්වීම හරහා මෙම ගිවිසුම කලාපීය ආරක්ෂක සහයෝගීතාවයේ සැලකිය යුතු වෙනසක් සනිටුහන් කරන බවයි.
