ජාතික තරුණ සේවා සභාවේ (NYSC) සභාපති සහ අධ්‍යක්ෂ ජනරාල් ධුරය දැරූ සමයේ රජයට රුපියල් මිලියන 5.1ක (රුපියල් ලක්ෂ 51ක) මූල්‍ය පාඩුවක් සිදුකළ බවට එල්ල වූ චෝදනා මත අල්ලස් හෝ දූෂණ චෝදනා විමර්ශන කොමිෂන් සභාව මඟින් අත්අඩංගුවට ගත් හිටපු සභාපති ලලිත් පියුම් පෙරේරා මහතා අධිකරණය මඟින් ඇප මත මුදාහැර තිබේ.
අල්ලස් කොමිසමේ නිලධාරීන් විසින් ඊයේ (28) බදාදා දින ඔහුව අත්අඩංගුවට ගනු ලැබුවේ, තරුණ සේවා සභාවේ සභාපතිවරයා ලෙස කටයුතු කළ කාලය තුළ සිදුකළ බව කියන මූල්‍ය අක්‍රමිකතාවක් සම්බන්ධයෙනි.
අම්පාරේ ඉඩම් ගනුදෙනුව සහ චෝදනා
විමර්ශන නිලධාරීන් අනාවරණය කරන අන්දමට, අම්පාර සමපුර ප්‍රදේශයේ පිහිටි ඉඩමක් සහ ගොඩනැගිල්ලක් රජයට අයත් එකක් බවට ව්‍යාජ ලෙස හඟවමින් බදු ගිවිසුම් සකස් කිරීමට හිටපු සභාපතිවරයා කටයුතු කර ඇත.
පසුව එම දේපළ ජාතික තරුණ සේවා සභාව වෙත බදු පදනම මත ලබාගෙන ඇති අතර, ඒ හරහා තරුණ සේවා සභාවට අයත් රුපියල් මිලියන 3.8ක මුදලක් නීතිවිරෝධී ලෙස තෙවැනි පාර්ශ්වයක් වෙත ගෙවා ඇති බවට විමර්ශනවලදී චෝදනා එල්ල වී තිබේ.
මීට අමතරව, ජාතික තරුණ සේවා සභාවේ අධ්‍යක්ෂ මණ්ඩලයේ විධිමත් අනුමැතියකින් තොරව අදාළ ගොඩනැගිල්ල ප්‍රතිසංස්කරණය කිරීම සඳහා තවත් රුපියල් මිලියන 1.3ක මුදලක් අයථා ලෙස වියදම් කර ඇති බවද විමර්ශනවලදී තවදුරටත් අනාවරණය වී ඇත.
අත්අඩංගුවට ගැනීමෙන් අනතුරුව ලලිත් පියුම් පෙරේරා මහතා කොළඹ ප්‍රධාන මහේස්ත්‍රාත් අධිකරණය හමුවට ඉදිරිපත් කිරීමෙන් පසු ඇප මත මුදාහැරීමට නියෝග කෙරිණි.
සිද්ධිය සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව වැඩිදුර විමර්ශන සිදුකරයි.
