පොළොන්නරුව, කදුරුවෙල ප්‍රදේශයේ තෙභාෂා පාසලක් සඳහා ඉන්දීය රජයේ ආධාර ඇතිව අර්ධ වශයෙන් ඉදිකර තිබූ ගොඩනැගිලි පරිශ්‍රය යොදාගනිමින් උතුරු මැද පළාත සඳහා නව ‘වෘත්තීය තාක්ෂණ විශ්වවිද්‍යාලයක්’ (Vocational Technology University) ස්ථාපිත කිරීමට රජයේ අවධානය යොමුව තිබේ.
වෘත්තීය අධ්‍යාපන අමාත්‍යාංශය සඳහන් කරන්නේ, යෝජිත විශ්වවිද්‍යාලය පිහිටුවීම සඳහා අදාළ ගොඩනැගිලි පරිශ්‍රය අමාත්‍යාංශය වෙත පවරා ගැනීමේ හැකියාව සොයාබැලීම වෙනුවෙන් ක්ෂේත්‍ර නිරීක්ෂණයක් සහ විශේෂ සාකච්ඡාවක් පොළොන්නරුව දිස්ත්‍රික් ලේකම් කාර්යාලයේදී පවත්වා ඇති බවයි.
ඉන්දීය රජයේ මූල්‍ය ආධාර යටතේ අර්ධ වශයෙන් ඉදිකර තිබූ මෙම ගොඩනැගිලි සංකීර්ණය පසුව ශ්‍රී ලංකා රජය වෙත භාරදී තිබිණි.
උසස් පෙළ නිලධාරීන්ගේ එකඟතාව
වෘත්තීය අධ්‍යාපන නියෝජ්‍ය අමාත්‍ය නලින් හේවගේ මහතාගේ ප්‍රධානත්වයෙන් පැවති මෙම සාකච්ඡාව සඳහා කථානායක ආචාර්ය ජගත් වික්‍රමරත්න, ජල සම්පාදන නියෝජ්‍ය අමාත්‍ය ටී.බී. සරත්, පාර්ලිමේන්තු මන්ත්‍රී පද්මසිරි බණ්ඩාර සහ පොළොන්නරුව දිස්ත්‍රික් ලේකම් සුදන්ත ඒකනායක යන මහත්වරුන් ඇතුළු රජයේ ජ්‍යෙෂ්ඨ නිලධාරීන් රැසක් සහභාගී වූහ.
මෙහිදී අදාළ ගොඩනැගිලිවල පවතින වත්මන් තත්ත්වය, වෘත්තීය අධ්‍යාපන කටයුතු සඳහා එහි යෝග්‍යතාව මෙන්ම උතුරු මැද පළාතේ තරුණ තරුණියන් වෙනුවෙන් උසස් අධ්‍යාපන අවස්ථා පුළුල් කිරීමේ දැඩි අවශ්‍යතාව පිළිබඳව දීර්ඝ වශයෙන් කරුණු සමාලෝචනය කෙරිණි.
සාකච්ඡාවෙන් අනතුරුව, අදාළ ගොඩනැගිලි වෘත්තීය අධ්‍යාපන අමාත්‍යාංශය වෙත කඩිනමින් පවරාගෙන යෝජිත තාක්ෂණ විශ්වවිද්‍යාලය කඩිනමින් ස්ථාපිත කිරීමට අවශ්‍ය ඉදිරි පියවර ගැනීමට සියලු පාර්ශ්වයන් එකඟතාව පළ කර ඇත.
පළාත් නවයටම විශ්වවිද්‍යාල
දිවයිනේ සියලුම පළාත් නවයම ආවරණය වන පරිදි වෘත්තීය තාක්ෂණ විශ්වවිද්‍යාල පිහිටුවීම රජයේ පුළුල් ප්‍රතිපත්තිමය සැලැස්මක කොටසකි. එමඟින් සාමාන්‍ය වෘත්තීය පුහුණු පාඨමාලා හදාරන සිසුන්ට උපාධි මට්ටම දක්වා අධ්‍යාපනය අඛණ්ඩව කරගෙන යාමට විධිමත් මාවතක් නිර්මාණය කෙරේ.
යෝජිත මෙම නව විශ්වවිද්‍යාලය හරහා උතුරු මැද පළාත තුළ උසස් වෘත්තීය අධ්‍යාපනයට ඇති ප්‍රවේශය පුළුල් වන අතර, දේශීය හා ජාත්‍යන්තර ශ්‍රම වෙළෙඳපොළ ඉල්ලුමට ගැළපෙන කුසලතා පූර්ණ ශ්‍රමිකයන් බිහිකිරීමටද ඉවහල් වනු ඇත. මීට අමතරව, මෙම අධ්‍යාපන ආයතනවල අවස්ථා විවර කිරීමේදී අදාළ පළාත්වල සිසුන්ට ප්‍රමුඛත්වය ලබාදීමට අපේක්ෂා කරන බවද අමාත්‍යාංශය වැඩිදුරටත් අවධාරණය කරයි.
