සිමෙන්ති සැපයුම්කරුවන් වටලා සඟවා ඇති තොග සොයා ගැනීමේ මෙහෙයුමක් ක්‍රියාත්මක කිරීමට රජය තීරණය කර ඇති බව ග්‍රාමීය නිවාස ඉදිකිරීම් සහ ගොඩනැගිලි ද්‍රව්‍ය කර්මාන්ත ප්‍රවර්ධන රාජ්‍ය අමාත්‍යාංශය පවසයි.
ග්‍රාමීය නිවාස ඉදිකිරීම් හා ගොඩනැගිලි ද්‍රව්‍ය කර්මාන්ත ප්‍රවර්ධන රාජ්‍ය අමාත්‍ය ඉන්දික අනුරුද්ධ මහතා සිමෙන්ති කර්මාන්තයේ පාර්ශවකරුවන් සහ පාරිභෝගික සේවා අධිකාරියේ නිලධාරීන් සමඟ ඊයේ පෙරවරුවේ පැවති සාකච්ඡාවකදී මෙම තීරණය ගෙන ඇත.
සැපයුම්කරුවන්ගේ ලැයිස්තුවක් සකස් කර වැටලීම් සිදු කිරීමට තීරණය විය. ඊට අමතරව සිමෙන්ති සාධාරණ මිලකට අලෙවි කරන බවට රාජ්‍ය අමාත්‍යාංශය, මුදල් අමාත්‍යාංශය සහ පාරිභෝගික කටයුතු පිළිබඳ අධිකාරිය මඟින් පියවර ගන්නවා.
රාජ්‍ය අමාත්‍යවරයා කියා සිටියේ ඇතැම් සැපයුම්කරුවන් මිල ඉහළ දැමීම සඳහා තොග සඟවාගෙන සිටින බවයි. කෙසේ වෙතත් වෙළෙඳපොළේ මෙට්‍රික් ටොන් ලක්ෂයක හිඟයක් පවතින බව අනාවරණය විය. ශ්‍රී ලංකාවට අවශ්‍ය මුළු මාසික තොග මෙට්‍රික් ටොන් 500,000 කි.
කිලෝග්‍රෑම් 50 සිමෙන්ති කොට්ටයක මිල රුපියල් 1500 සිට 1700 දක්වා පරාසයක පවතින බව පැවසේ.
