ග්‍රාමීය ජනතාව නගරවලට ඇදී ඒම වෙනුවට ගම්මාන තුළම ආර්ථික අවස්ථා සහ අවශ්‍ය පහසුකම් ඇති කිරීම රජයේ ආර්ථික හා සමාජ සංවර්ධන වැඩපිළිවෙළේ ප්‍රධාන අරමුණ බව ජනාධිපති අනුර කුමාර දිසානායක මහතා ප්‍රකාශ කළේය.
ග්‍රාම නිලධාරී සේවයේ III ශ්‍රේණියට සුදුසුකම් ලැබූ නිලධාරීන් 1,540 දෙනෙකුට පත්වීම් ලිපි ප්‍රදානය කිරීම වෙනුවෙන් අරලියගහ මන්දිරයේ පැවති උත්සවයකදී ජනාධිපතිවරයා මේ බව සඳහන් කළේය.
ගම්මාන සහ නගර සම්බන්ධ කරමින් විධිමත් මාර්ග පද්ධතියක් ස්ථාපිත කිරීම, කාර්යක්ෂම සන්නිවේදන පද්ධතියක් ගොඩනැගීම සහ ඵලදායී රාජ්‍ය සේවයක් පවත්වාගෙන යාම මෙහිදී අවධාරණය කළ ජනාධිපතිවරයා, ඉදිරි වසර තුන ඇතුළත රට පුරා ක්‍රියාත්මක වන සන්නිවේදන පද්ධතියක් සංවර්ධනය කිරීමට සැලසුම් කර ඇති බවද පැවසීය.
එහි මූලික පියවරක් ලෙස ලබන වසරේදී දිස්ත්‍රික්ක දෙකක් ආවරණය වන පරිදි නියමු ව්‍යාපෘතියක් ක්‍රියාත්මක කිරීමට නියමිත අතර, ඒ සඳහා ඉදිරි අයවැය මඟින් ප්‍රතිපාදන වෙන් කිරීමට අපේක්ෂා කරන බවද ජනාධිපතිවරයා සඳහන් කළේය. මෙම වැඩපිළිවෙළ ඩිජිටල් ආර්ථික අමාත්‍යාංශය සමඟ සම්බන්ධීකරණයෙන් ක්‍රියාත්මක කෙරේ.
නව ග්‍රාම නිලධාරී සේවා ව්‍යවස්ථාව ප්‍රකාශයට පත් කිරීමෙන් අනතුරුව මෙම බඳවා ගැනීම් සිදුකර ඇති අතර, ඒ සඳහා විභාග ප්‍රතිඵල සහ සම්මුඛ පරීක්ෂණවලදී දැක්වූ කුසලතා පමණක් සැලකිල්ලට ගත් බව ජනාධිපතිවරයා පැවසීය.
සංශෝධිත සේවා ව්‍යුහය යටතේ ග්‍රාම නිලධාරීවරුන්ගේ දීමනා ද ඉහළ නංවා තිබේ. ඒ අනුව කාර්යාල දීමනාව රුපියල් 1,000 සිට රුපියල් 2,000 දක්වාත්, නිල ඇඳුම් දීමනාව රුපියල් 5,000 සිට රුපියල් 15,000 දක්වාත්, ලිපිද්‍රව්‍ය මිලදී ගැනීම සඳහා ලබාදෙන දීමනාව රුපියල් 1,500 සිට රුපියල් 3,000 දක්වාත් වැඩි කර ඇත.
රාජ්‍ය සේවයේ පුළුල් ප්‍රතිසංස්කරණ පිළිබඳවද අදහස් දැක්වූ ජනාධිපතිවරයා, මහජනතාව මත පැටවෙන බර අඩු කිරීමේ අරමුණින් මුදල් අමාත්‍යාංශය විසින් හඳුනාගෙන ඇති රාජ්‍ය ආයතන 33ක් ඒකාබද්ධ කිරීමට හෝ වසා දැමීමට සැලසුම් කර ඇති බව සඳහන් කළේය.
එමෙන්ම රාජ්‍ය සේවකයන්ගේ මූලික වැටුප් අදියර තුනක් යටතේ ඉහළ නැංවීමට කටයුතු කරමින් සිටින බවත්, ඒ වෙනුවෙන් 2027 වසර වන විට අමතර රුපියල් බිලියන 330ක වියදමක් දැරීමට අපේක්ෂා කරන බවත් ජනාධිපතිවරයා පැවසීය.
රාජ්‍ය පරිපාලන, පළාත් සභා හා පළාත් පාලන අමාත්‍ය මහාචාර්ය ඒ.එච්.එම්.එච්. අබයරත්න, එම අමාත්‍යාංශයේ නියෝජ්‍ය අමාත්‍ය රුවන් සෙනරත්, ජනාධිපති කාර්ය මණ්ඩල ප්‍රධානී ප්‍රභාත් චන්ද්‍රකීර්ති, අග්‍රාමාත්‍ය ලේකම් ප්‍රදීප් සපුතන්ත්‍රි සහ අමාත්‍යාංශ ලේකම් එස්. අලෝක බණ්ඩාර ඇතුළු රාජ්‍ය නිලධාරීහු පිරිසක් මෙම අවස්ථාවට එක්ව සිටියහ.
