හිටපු කථානායක කරු ජයසූරිය මහතා සති අන්තයේ නිවේදනයක් නිකුත් කරමින් රජයේ මුදල් පිළිබඳ කාරක සභාව (CoPF) පාර්ලිමේන්තුවේ වගකීම් හඳුනාගෙන මහජන යහපත වෙනුවෙන් තීරණාත්මක තීරණ කිහිපයක් ගැනීම සම්බන්ධයෙන් ප්‍රශංසා කළේය.
“ඉදිකිරීම් කර්මාන්තයට අවශ්‍ය ද්‍රව්‍ය ඇතුළුව අපගේ දෛනික ජීවිතයට අත්‍යවශ්‍ය භාණ්ඩ කිහිපයක් සම්බන්ධයෙන් CoPF මෑතකාලීනව ගත් තීරණය අගය කළ යුතුයි,” ජයසූරිය මහතා පැවසීය.
“සිමෙන්ති ඇතුළු ඉදිකිරීම් ක්ෂේත්‍රයට අවශ්‍ය භාණ්ඩ ආනයනය කර බෙදාහරින සමාගම් විසින් ලබන නීතිවිරෝධී ලාභය යම් සීමාවකට ගෙන ඒමට CoPF තීරණයක් ගෙන තිබෙනවා. තිරිඟු පිටි කිලෝවක මිල රුපියල් 198ක් ලෙස පවත්වාගෙන යා හැකි බව පෙන්වා දෙමින් තීරණයක් ගෙන තිබෙනවා.
පාර්ලිමේන්තු කාරක සභාවල සිටින සියලුම සාමාජිකයින් දිරිමත් කිරීම වැදගත් වන අතරම ඔවුන්ගේ වගකීම් සහ කාර්යභාරයන් පිළිබඳවද මතක් කරදීම වැදගත් බැවින් සමාජ සාධාරණත්වය පිළිබඳ ජාතික ව්‍යාපාරය මෙම ප්‍රශංසාව නිකුත් කිරීමට තීරණය කළ බව හිටපු කථානායකවරයා පැවසීය. පාර්ලිමේන්තු පරිශ්‍රය තුළ නිතර සිදුවන පටු දේශපාලන න්‍යාය පත්‍ර මුල්කරගත් මතභේදාත්මක ආරවුල් සහ ඵලදායි නොවන සාකච්ඡාවලට ප්‍රතිවිරුද්ධව, මෙම මැදිහත්වීම ජනතා අභිවෘද්ධිය සඳහා සාධනීය පියවරක් ලෙස සංවිධානය සලකන බව ජයසූරිය මහතා පැවසීය.
“ශ්‍රී ලංකාව බරපතළ ආර්ථික අර්බුදයකට මුහුණ දී සිටින මොහොතක, අසීමිත ලාභ ඉපැයීමට පමණක් කටයුතු කරන ඇතැම් ආනයනකරුවන්ගේ අසාධාරණ ක්‍රියාවන් පිළිබඳව සෑම වගකිවයුතු ආයතනයක්ම විමර්ශනය කර මැදිහත් විය යුතුය.
එහිදී, රාජ්‍ය මූල්‍ය කළමනාකරණය ඇතුළු ප්‍රතිපත්ති සැකසීමේ ප්‍රමුඛ වගකීම පැවරී ඇති පාර්ලිමේන්තුවට අත හැරිය නොහැකි විශාල වගකීමක් තිබේ. පාර්ලිමේන්තු කමිටුවලට ද අත්‍යවශ්‍ය කාර්යභාරයක් ඉටු කිරීමට ඇත,” එම නිවේදනයේ සඳහන් වේ.
සුළු හා මධ්‍ය පරිමාණ ව්‍යාපාරික ප්‍රජාවට දැඩි ලෙස බලපාන ඉහළ පොලී අනුපාත පිළිබඳව ද අවධානය යොමු කළ හිටපු කථානායකවරයා ඒවා රටේ ප්‍රගතියට හානි කරන බව ප්‍රකාශ කළේය. “මේ සම්බන්ධයෙන් ශ්‍රී ලංකා මහ බැංකුව විසින් නිකුත් කර ඇති නියෝග සැලකිල්ලට ගනිමින්, මේ සම්බන්ධයෙන් මැදිහත් වන ලෙස අපි CoPF වෙතින් ඉල්ලා සිටීමට කැමැත්තෙමු,” ජයසූරිය පැවසීය.
