ඊයේ (22) පාර්ලිමේන්තුවේදී අදහස් දක්වමින් අමාත්‍යවරයා අනාවරණය කළේ, දෙපාර්තමේන්තුවේ කාර්ය මණ්ඩලය ශක්තිමත් කිරීමට සහ පවතින පුරප්පාඩු පිරවීමට ගත් පියවරවලින් අනතුරුව අගෝස්තු සහ සැප්තැම්බර් මාස දෙක තුළ පමණක් රජයේ රස පරීක්ෂක වාර්තා 1,506ක් නිකුත් කර ඇති බවයි.
රජයේ රස පරීක්ෂක වාර්තා ලබාගැනීමේ ප්‍රමාදය බන්ධනාගාරවල තදබදය ඉහළ යාමට බලපාන ප්‍රධාන හේතුවක් ලෙස හඳුනාගෙන ඇති බව ද ඔහු පැහැදිලි කළේය.
යෝජිත නීති සංශෝධන යටතේ, පරීක්ෂා කිරීම සඳහා භාරගන්නා භාණ්ඩයක් සම්බන්ධයෙන් අදාළ වාර්තාව මාස දෙකක් ඇතුළත නිකුත් කිරීම රජයේ රස පරීක්ෂකවරයාට අනිවාර්ය කෙරෙන බව ද අමාත්‍යවරයා සඳහන් කළේය.
මේ අතර, බන්ධනාගාර තදබදය අවම කිරීම සඳහා හඳුන්වා දුන් පියවර හේතුවෙන් බන්ධනාගාරගත රැඳවියන් සංඛ්‍යාව සැලකිය යුතු ලෙස අඩු වී ඇති බව ද නානායක්කාර මහතා අනාවරණය කළේය.
අමාත්‍යවරයාට අනුව, ජූලි 1 වැනිදා 41,993ක් වූ බන්ධනාගාරගත රැඳවියන් සංඛ්‍යාව සැප්තැම්බර් 30 වැනිදා වන විට 36,925 දක්වා පහත වැටී තිබේ. ඒ අනුව රැඳවියන් සංඛ්‍යාව 5,068කින් අඩු වී ඇත.
අපරාධ නඩුවල සාක්ෂි ලෙස අත්අඩංගුවට ගන්නා මත්ද්‍රව්‍ය සම්බන්ධයෙන් කටයුතු කිරීම සඳහා යෝජිත නීති සංශෝධන පිළිබඳව ද අමාත්‍යවරයා කරුණු පැහැදිලි කළේය.
යෝජිත සංශෝධන අනුව, අධිකරණ කටයුතු අවසන් වන තෙක් මත්ද්‍රව්‍ය අඩංගු සම්පූර්ණ ඇසුරුම් රඳවා තබා ගැනීම වෙනුවට, අදාළ මත්ද්‍රව්‍ය ඡායාරූපගත කිරීමටත්, අවශ්‍ය අවස්ථාවලදී වීඩියෝගත කිරීමටත් බලධාරීන්ට අවසර ලැබෙනු ඇත. ඉන් අනතුරුව අදාළ මහේස්ත්‍රාත්වරයා දැනුවත් කළ යුතුය.
අධිකරණය විසින් පනවනු ලබන කොන්දේසිවලට යටත්ව, එම මත්ද්‍රව්‍ය කඩිනමින් විනාශ කිරීමට අවසර ලබාදීමේ බලය මහේස්ත්‍රාත්වරයාට හිමිවනු ඇත.
මෙම ක්‍රියාපටිපාටි නීත්‍යනුකූලව ක්‍රියාත්මක කිරීම සහතික කිරීම මෙම සංශෝධනවල අරමුණ බව අමාත්‍ය නානායක්කාර මහතා අවධාරණය කළේය. එමෙන්ම, සැකකරුවන්ගේ හෝ චූදිතයන්ගේ මූලික අයිතිවාසිකම්වලට, විශේෂයෙන් සාධාරණ නඩු විභාගයකට ඇති අයිතියට, කිසිදු බලපෑමක් නොවන අයුරින් මෙම කටයුතු සිදු කළ යුතු බව ද ඔහු පැවසීය.
