ප්රංශයේ පැරිස් නුවර පිහිටි ලෝක ප්රකට අයිෆල් කුළුණ සඳුදා දින වසා දැමීමට සිදුවූයේ, හින්දු ආගමික සංවිධානයකට සම්බන්ධ පිරිසක් පැමිණි අවස්ථාවේ කාන්තා සේවිකාවන් ඔවුන්ගේ සේවා ස්ථානවලින් ඉවත් කළ බවට චෝදනා කරමින් සේවකයන් වැඩ වර්ජනයකට එක්වීම හේතුවෙනි.
බොචසන්වාසි අක්ෂර් පුරුෂෝත්තම් ස්වාමිනාරායන් සංස්ථා (BAPS) සංවිධානයට සම්බන්ධ පුද්ගලයන් 100කට ආසන්න පිරිසකගෙන් සමන්විත දූත පිරිසක් සෙනසුරාදා පැරිස් නුවර මෙම ප්රකට ස්මාරකය නැරඹීමට පැමිණ තිබුණි.
සේවක සංගම් නියෝජිත ඩයන් ඩාවොයින් පැවසුවේ එම පිරිස අයිෆල් කුළුණට පැමිණි අවස්ථාවේදී එහි සේවය කරමින් සිටි කාන්තාවන්ට තම ස්ථානවලින් ඉවත් වන ලෙස දැනුම් දී ඇති බවයි.
“මෙම දූත පිරිසගේ සංචාරය අතරතුරදී පිරිමින් එම ස්ථානවල යෙදවීම සඳහා කාන්තාවන්ට ඔවුන්ගේ සේවා ස්ථානවලින් ඉවත් වන ලෙස දැනුම් දී තිබුණා,” යනුවෙන් ඇය රොයිටර් පුවත් සේවයට පැවසුවාය.
සිද්ධිය සම්බන්ධයෙන් කළමනාකාරීත්වය පසුව සේවකයන්ගෙන් සමාව ඉල්ලා ඇති බවද ඩාවොයින් සඳහන් කළාය.
“සිදුවූ දේ සහ ඇතැම් කාන්තාවන්ට සැලකූ ආකාරය නිසා ඔවුන් සියලුදෙනාම අපහාසයට හා අවමානයට ලක්වූ බවක් දැනෙනවා. එය සේවකයන්ට, විශේෂයෙන්ම කාන්තාවන්ට කිසිසේත්ම පිළිගත හැකි දෙයක් නොවෙයි,” ඇය පැවසුවාය.
සති අන්තය පුරා තත්ත්වය උණුසුම් වූ බවත්, සඳුදා උදෑසන සේවකයන් රැස්වී පළමුව කළමනාකාරීත්වය සමඟ සංවාදයක් ආරම්භ කිරීමටත්, ඉදිරියේදී කිසිදු කාන්තාවකට මෙවැනි ආකාරයෙන් සැලකීමක් සිදු නොවන බව තහවුරු කර ගැනීමටත් තීරණය කළ බවත් ඇය සඳහන් කළාය.
පැරිස් නුවර අයිෆල් කුළුණ පවත්වාගෙන යන Société d’Exploitation de la Tour Eiffel (SETE) සමාගමද සිද්ධිය තහවුරු කර තිබේ.
AFP පුවත් සේවය වාර්තා කළ පරිදි, මෙම දූත පිරිස විසින් සිය සංචාරය සංවිධානය කරන විට “කාන්තාවන් සමඟ අන්තර්ක්රියා අවම වන” ආකාරයට එය සිදු කරන ලෙස ඉල්ලා තිබුණි.
එවැනි කොන්දේසි පිළිගත යුතු නොවූ බව SETE සමාගම ප්රකාශ කර තිබේ.
“එම කොන්දේසි SETE සමාගමේ වටිනාකම්වලට හෝ කාන්තාවන් සහ පිරිමින් අතර සමානාත්මතාව පිළිබඳ මූලධර්මවලට කිසිසේත්ම අනුකූල නොවේ,” යනුවෙන් සමාගම සඳහන් කළේය.
SETE සභාපති ඒරියල් වෙයිල් පැවසුවේ මෙය “පැහැදිලිවම පිළිගත නොහැකි ක්රියාවක්” බවයි.
“අයිෆල් කුළුණ ජනරජවාදී වටිනාකම් සහ කාන්තාවන් හා පිරිමින් අතර සමානාත්මතාව වෙනුවෙන් කැපවී සිටින බව මම යළිත් අවධාරණය කරනවා,” ඔහු පැවසීය.
මේ සම්බන්ධයෙන් CGT වෘත්තීය සමිතියෙන් ප්රතිචාරයක් ලබා ගැනීමට BBC පුවත් සේවය උත්සාහ කර තිබේ.
මේ අතර, BAPS සංවිධානය විසින් ප්රංශයේ සිය පළමු ප්රධාන හින්දු කෝවිල ඉරිදා පැරිස් නුවර තදාසන්න ප්රදේශයකදී විවෘත කර තිබුණි.
X සමාජ මාධ්ය ඔස්සේ නිවේදනයක් නිකුත් කරමින් පැරිස් BAPS කෝවිල සඳහන් කළේ, අයිෆල් කුළුණේ කණ්ඩායම සමඟ එක්ව මෙම සංචාරය සංවිධානය කළේ සාමාන්ය විවෘත වේලාවන් ආරම්භයේදී බවත්, එමඟින් අනෙකුත් සංචාරකයන්ට බාධාවක් හෝ අපහසුතාවක් ඇති නොකිරීමට කටයුතු කළ බවත්ය.
“ඇතිවූ කිසියම් වේදනාවක් හෝ අපහසුතාවක් සම්බන්ධයෙන් අපි සමාව ඉල්ලා සිටිනවා. අන්යෝන්ය ගෞරවය සහ සේවය යන විශ්වීය වටිනාකම් අපි විශ්වාස කරනවා,” යනුවෙන් එම සංවිධානය සඳහන් කළේය.
BAPS සිය වෙබ් අඩවියේ තමන්ව හඳුන්වා දෙන්නේ හින්දු ආගමික වටිනාකම් ඔස්සේ සමාජය යහපත් කිරීම වෙනුවෙන් කටයුතු කරන “ආධ්යාත්මික හා ස්වේච්ඡා සේවකයන් විසින් මෙහෙයවන සංවිධානයක්” ලෙසය.
ලන්ඩන්, ලොස් ඇන්ජලීස් සහ සිඩ්නි ඇතුළු ලොව ප්රධාන නගර රැසක එම සංවිධානයට අයත් කෝවිල් පිහිටා තිබේ.
සිද්ධියට අදාළ තත්ත්වයන් පිළිබඳ විමර්ශනයක් සිදු කරන බව පැරිස් නගරාධිපති එමානුවෙල් ග්රෙගෝවා ප්රකාශ කළේය.
“අයිෆල් කුළුණේ සේවකයන් විසින් පළ කළ කෝපය මම සැලකිල්ලට ගන්නවා. ඔවුන්ගේ අප්රසාදය සාධාරණ බව මම ඔවුන්ට කියන්න කැමතියි,” යනුවෙන් ඔහු X ඔස්සේ සඳහන් කළේය.
“කාන්තාවන් සහ පිරිමින් අතර සමානාත්මතාව අපගේ ඓතිහාසික ස්මාරක පාමුලදී හෝ මෙම නගරයේ කිසිදු ස්ථානයකදී නතර නොවනු ඇත. එය සෑම තැනකම, සෑම කෙනෙකු වෙනුවෙන්ම ක්රියාත්මක විය යුතුයි,” ඔහු පැවසීය.
ප්රංශයේ දක්ෂිණාංශික දේශපාලන නායිකා මරීන් ලෙ පෙන්ද සිද්ධිය සම්බන්ධයෙන් අදහස් දක්වමින්, “ප්රංශයේදී කාන්තාවන්ගේ පැවැත්ම සීමා කිරීමට අපි කිසිවිටෙකත් ඉඩ දෙන්නේ නැහැ,” යනුවෙන් පැවසුවාය.
ලබන වසරේ ජනාධිපතිවරණයට තරග කිරීමට අපේක්ෂා කරන හිටපු මධ්ය දක්ෂිණාංශික ප්රංශ අගමැති ගේබ්රියෙල් අටාල් පැවසුවේ, “ප්රංශයේදී කිසිදු සංස්කෘතියකට, කිසිදු විශ්වාසයකට, කිසිදු ආගමකට, කිසිදු දෙයකට හෝ කිසිවෙකුට කාන්තාවන්ගේ ස්ථානය තීරණය කිරීමට බලපෑම් කළ නොහැකියි,” යනුවෙනි.
ප්රංශ ජාතික සභාවේ සභාපතිනි යාඑල් බ්රෝන් පීවේද ප්රකාශ කළේ, “විදේශීය අමුත්තන්ගේ ඉල්ලීම් සපුරාලීම සඳහා කාන්තාවන්ට ඉවත් වීමට බල කිරීම කිසිසේත්ම මම පිළිගන්නේ නැහැ,” යනුවෙනි.
