හිටපු මුදල් අමාත්ය අලි සබ්රි පවසන්නේ ශ්රී ලංකාවේ ආර්ථික අර්බුදය සම්බන්ධයෙන් ජාත්යන්තර මූල්ය අරමුදලේ (IMF) නියෝජිතයින් සමඟ පැවැති තීරණාත්මක සාකච්ඡාවකදී ඉන්දීය මුදල් අමාත්ය නිර්මලා සීතාරාමන් කළ මැදිහත්වීම හේතුවෙන් සාකච්ඡාවේ තත්ත්වය ශ්රී ලංකාවට වාසිදායක ලෙස වෙනස් වූ බවයි.
Impactstories_podcast සමඟ අදහස් දක්වමින් අලි සබ්රි සඳහන් කළේ, තමන් මුදල් අමාත්යවරයාව සිටි සමයේ ශ්රී ලංකාවේ ආර්ථික අර්බුදය සම්බන්ධයෙන් IMF නායකත්වය සමඟ සාකච්ඡා කිරීමේ වගකීම තමන්ට පැවරී තිබූ බවයි.
“මම වොෂින්ටනයට ගිය විට කලාපීය අධ්යක්ෂවරුන් සමඟ සාකච්ඡාවක් තිබුණා. ඔවුන් ශ්රී ලංකාව සම්බන්ධයෙන් ඉතාමත් අසුබවාදී අදහසක සිටියා. මෙය 16 වැනි වතාවටත් සිදුවන දෙයක් බව ඔවුන් කිව්වා. මම කලකිරුණා. අපි පළමු වතාවට වෙනස් ආකාරයකින් කරුණු පැහැදිලි කරන්න උත්සාහ කරමින් සිටියත් ඔවුන් සවන් දීමට සූදානම් වුණේ නැහැ. ඔවුන්ට සංවේදී අවබෝධයක් නොතිබුණා කියලා මට හිතුණා,” යනුවෙන් ඔහු පැවසීය.
අලි සබ්රි සඳහන් කළේ, එදින පස්වරු 3.00ට IMF කළමනාකාර අධ්යක්ෂ ක්රිස්ටලීනා ජෝර්ජීවා සහ නියෝජ්ය කළමනාකාර අධ්යක්ෂ ගීතා ගෝපිනාත් සමඟ තමන්ට සාකච්ඡාවක් පැවැත්වීමට නියමිතව තිබූ බවයි.
ඊට පෙර තමන් ඉන්දීය මුදල් අමාත්ය නිර්මලා සීතාරාමන් සමඟ දිවා ආහාරය ගත් බවත්, එහිදී ඇය IMF සාකච්ඡාව පිළිබඳව විමසූ බවත් ඔහු පැවසීය.
“ඇය ඇහුවා, ‘ඇමතිතුමා, සාකච්ඡාව කොහොමද ගියේ?’ කියලා. මම කිව්වා එතරම් හොඳින් ගියේ නැහැ කියලා. ඔවුන් අකමැත්තෙන් වගේ හිටියා, ප්රශ්න ගොඩක් තිබුණා. ඇය කිව්වා ‘කලබල වෙන්න එපා, මම ඔබට කලින් ක්රිස්ටලීනා ජෝර්ජීවා හමුවෙන්නම්. මම ශ්රී ලංකාව ගැන කතා කරන්නම්’ කියලා,” අලි සබ්රි පැවසීය.
ඉන් අනතුරුව IMF නායකත්වය සමඟ පැවැති සාකච්ඡාවට තමන් සහභාගී වූ අවස්ථාවේදී සාකච්ඡාවේ ස්වරය, ප්රවේශය සහ සමස්ත පරිසරය සම්පූර්ණයෙන්ම වෙනස් වී තිබූ බව ඔහු සඳහන් කළේය.
ක්රිස්ටලීනා ජෝර්ජීවා තමන්ට පැවසුවේ ඊට මොහොතකට පෙර නිර්මලා සීතාරාමන් සමඟ සාකච්ඡාවක් අවසන් කළ බවත්, එම සාකච්ඡාවේ 70%ත් 80%ත් අතර ප්රමාණයක් ඉන්දියාව සම්බන්ධයෙන් නොව ශ්රී ලංකාව සම්බන්ධයෙන් පැවැති බවත් අලි සබ්රි පැවසීය.
තමන්ට අනුව, එම මැදිහත්වීම ශ්රී ලංකාවේ ආර්ථික ප්රකෘතිමත් වීම සඳහා පසුව ගොඩනැගුණු ක්රියාවලියේ පදනමක් බවට පත්වූ බව හිටපු මුදල් අමාත්යවරයා සඳහන් කළේය.
