ශ්‍රී ලංකා කාන්තා ක්‍රිකට් කණ්ඩායමේ ප්‍රධාන පුහුණුකරු ජේමි සිඩන්ස් සිය ධුරයෙන් ඉල්ලා අස්වී නොමැති බවත්, පෞද්ගලික කාරණයක් හේතුවෙන් කණ්ඩායමේ මීළඟ සංචාරයට එක් නොවන බවත් ශ්‍රී ලංකා ක්‍රිකට් ආයතනයේ ප්‍රධාන විධායක නිලධාරීවරයා Newswire වෙත පවසා තිබේ.
සිඩන්ස් සිය ගිවිසුම් කාලය අවසන් වීමට පෙර ධුරයෙන් ඉවත් වී ඇති බවට පළ වූ මාධ්‍ය වාර්තා පැහැදිලි කරමින් ප්‍රධාන විධායක නිලධාරීවරයා සඳහන් කර ඇත්තේ ඕස්ට්‍රේලියානු ජාතික සිඩන්ස් මේ වන විට පෞද්ගලික කාරණයක් සම්බන්ධයෙන් කටයුතු කිරීම සඳහා විදේශගතව සිටින බවත්, ඔහු යළි සිය ධුරයේ වැඩ භාර ගැනීමට නියමිත බවත්ය.
සිඩන්ස් යළි පැමිණෙන තෙක් රුමේෂ් රත්නායක අන්තර්වාර ප්‍රධාන පුහුණුකරු ලෙස කණ්ඩායමේ කටයුතු තාවකාලිකව මෙහෙයවනු ඇත.
මෙම වැඩපිළිවෙළ තාවකාලික එකක් බවත්, එය ස්ථිර පුහුණුකරු වෙනසක් ලෙස සැලකිය නොහැකි බවත් ප්‍රධාන විධායක නිලධාරීවරයා වැඩිදුරටත් සඳහන් කර තිබේ.
