ගෑස් සිලින්ඩරයෙන් තරඟ වැදුණු නව ප්‍රජාතන්ත්‍රවාදී පෙරමුණේ ජාතික ලැයිස්තු මන්ත්‍රී ධුරයක් සඳහා එම පෙරමුණේ අනුමැතියකින් තොරව රවී කරුණානායක මහතා පත්කිරීම සම්බන්ධයෙන් පරීක්ෂණ පැවැත්වීම සඳහා කමිටුවක් පත්කර තිබේ.
එම කමිටුවේ පරීක්ෂණ වාර්තාව සති තුනක් ඇතුළත එක්සත් ජාතික පක්ෂ නායක හිටපු ජනාධිපති රනිල් වික්‍රමසිංහ මහතා වෙත බාරදීමට ද තීරණය විය.
හිටපු ජනාධිපති රනිල් වික්‍රමසිංහ මහතා ඇතුළු නව ප්‍රජාතන්ත්‍රවාදී පෙරමුණේ නායකයන්ගේ සහභාගීත්වයෙන් කොළඹ මල් පාරේ පිහිටි එම පෙරමුණේ කාර්යාලයේදී පැවති විශේෂ සාකච්ඡාවකදී මෙම තීරණයට එළඹ ඇත.
නීතීඥ කුමාර් දුනසිංහ,නීතිඥ ඉන්දික වේරගොඩ,ආචාර්ය විතානගේ සහ නීතිඥ යසස් ද සිල්වා මහත්වරු එම කමිටුවේ සාමාජිකයෝ වෙති.
එම කමිටුවේ පරීක්ෂණ වාර්තාව එක්සත් ජාතික පක්ෂ කෘත්‍යාධිකාරී මණ්ඩලය වෙත ලබා දීමට නියමිත බවත් අනතුරුව කෘත්‍යාධිකාරී මණ්ඩලයෙන් රවී කරුණානායක මහතා සම්බන්ධයෙන් නිසි තීරණයක් ගැනීමට නියමිත බවත් නව ප්‍රජාතන්ත්‍රවාදී පෙරමුණේ ජ්‍යෙෂ්ඨ ප්‍රකාශකයෙක් පැවසීය.
