පාර්ලිමේන්තු මන්ත්‍රීවරුන් පිරිසක් කොළඹ වරායේ නිරීක්ෂණ චාරිකාව නීති විරෝධී ලෙස වීඩියෝ ගත කළ වරාය අධිකාරියේ වෘත්තීය සමිති සාමාජිකයින් සම්බන්ධයෙන් වහාම පරීක්ෂණයක් ආරම්භ කර ඔවුන් අපරාධ පරීක්ෂණ දෙපාර්තමේන්තුව භාරයට ගත යුතු බව වරාය හා ගුවන් සේවා රාජ්‍ය අමාත්‍ය ප්‍රේමලාල් ජයසේකර මහතා පවසයි.
කොළඹ වරායේ නැගෙනහිර සහ බටහිර ජැටිය නැරඹීමට අවශ්‍ය බව අයවැය විවාදයේදී මන්ත්‍රීවරුන් කිහිප දෙනෙකු කළ ඉල්ලීමකට අනුව මන්ත්‍රීවරුන් 20 දෙනෙකුගෙන් යුත් කණ්ඩායමක් කොළඹ වරායේ නිරීක්ෂණ චාරිකාවක් සඳහා රැගෙන ගිය බව ඔහු පාර්ලිමේන්තුවේදී පැවසීය. බටහිර ජැටිය ප්‍රමාදයි.
“ඔවුන්ගේ ඉල්ලීම්වලට ඇහුම්කන් දීම රාජ්‍ය අමාත්‍යවරයා ලෙස මගේ යුතුකමයි. සමහර මාධ්‍ය සහ දේශපාලඥයන් අපි සාදයක් තිබ්බා යැයි කියමින් මෙම සංචාරය ගැන කටකතා පතුරවනවා. ඔවුන්ට එරෙහිව පියවර ගත යුතුයි. ඇතැම් වෘත්තීය සමිති සාමාජිකයන් මෙම සංචාරය නීති විරෝධී ලෙස වීඩියෝ කර තිබුණා. සිද්ධිය සම්බන්ධයෙන් පරීක්ෂණයක් ආරම්භ කළ යුතු අතර ඔවුන් අපරාධ පරීක්ෂණ දෙපාර්තමේන්තුව භාරයට ගත යුතුයි.
මෙම සංචාරය සඳහා වරාය අධිකාරියේ සතයක්වත් වැය නොකළ බවත් ඒ සඳහා කළ වියදම් පිළිබඳ සියලු බිල්පත් තමන් සභාගත කරන බවත් අමාත්‍යවරයා පැවසීය.
ඔහු මේ බව කියා සිටියේ රට බංකොලොත් වී ඇති අවස්ථාවක මහජන මුදල් වියදම් කර මන්ත්‍රීවරුන් පිරිසක් ඩ්‍රෙජර් දෙකක සාදයක් පැවැත්වූ බවට විපක්ෂ නායක සජිත් ප්‍රේමදාස කළ චෝදනාවට පිළිතුරු ලබාදෙමින්.
