නිකුත් කළ මාධ්‍ය නිවේදනයකට අනුව, රණවක මහතාගේ නීතිඥ කණ්ඩායම වෙනුවෙන් ජ්‍යෙෂ්ඨ නීතිඥ ශිරාල් ලක්තිලක මහතා මෙම පැමිණිල්ල ඉදිරිපත් කර ඇත. අපරාධයක වින්දිතයන් සහ සාක්ෂිකරුවන් සහාය දීමේ හා ආරක්ෂා කිරීමේ පනතේ විධිවිධාන අනිසි ලෙස භාවිත කර තිබේද යන්න සම්බන්ධයෙන් එම පැමිණිල්ලෙන් ප්‍රශ්න කර තිබේ.
නීතිඥ රාජික කොඩිතුවක්කු සහ තික්ෂණ ගම්මන්පිල යන මහත්වරුන් විසින් මෙම පැමිණිල්ල අපරාධයක වින්දිතයන් සහ සාක්ෂිකරුවන් ආරක්ෂා කිරීම සඳහා වූ ජාතික අධිකාරියට සහ නීතිපති දෙපාර්තමේන්තුවට භාරදීමට නියමිතය.
කොළඹ මහාධිකරණයේ විභාග වෙමින් පවතින HC 1824/20 දරන නඩුවේදී 2026 ඔක්තෝබර් 19 වැනිදා ලබාදුන් සාක්ෂියක් සම්බන්ධයෙන් මෙම පැමිණිල්ල ඉදිරිපත් කර තිබේ.
මාධ්‍ය නිවේදනයට අනුව, මුල් නඩු විභාගයේදී සාක්ෂි ලබාදීම සඳහා ශ්‍රී ලංකාවට පැමිණීමට නොහැකි බව සාක්ෂිකරු මීට පෙර සිය නීතිඥවරුන් මාර්ගයෙන් අධිකරණයට දැනුම් දී තිබිණි.
කෙසේ වෙතත්, එම සාක්ෂිකරු ජර්මනියේ සිට ශ්‍රී ලංකාවට ගෙන්වීම සඳහා ගුවන් ගමන් සහ ඊට අදාළ වෙනත් වියදම් වෙනුවෙන් රුපියල් 450,000ක පමණ මුදලක් වැය කර ඇති බව පැවසේ.
සාක්ෂි ලබාදීමේදී තම ගමන් වියදම් පෞද්ගලිකව තමන් විසින් නොගෙවූ බව සාක්ෂිකරු සඳහන් කර ඇති අතර, එම වියදම් දැරූ පුද්ගලයා ලෙස “CCD අධ්‍යක්ෂ ඉන්දික මහතා” හඳුනාගෙන ඇති බව ද වාර්තා වේ.
විදේශගත සාක්ෂිකරුවන්ගෙන් සාක්ෂි ලබාගැනීම සඳහා නීතියෙන් නියම කර ඇති ක්‍රියාපටිපාටි අනුගමනය කර තිබේද සහ මහජන මුදල් වැය කිරීම අදාළ මූල්‍ය රෙගුලාසිවලට අනුකූලද යන්න පිළිබඳව විමර්ශනයක් සිදු කරන ලෙස පැමිණිල්ලෙන් ඉල්ලා තිබේ.
සාක්ෂිකරුවන් සම්බන්ධ කටයුතුවලට අනිසි බලපෑම් සිදුකර තිබේද යන්න පිළිබඳව ද එමගින් අවධානය යොමු කර ඇත. එමෙන්ම, සාක්ෂිකරුට අදාළව ගෙන ඇති ක්‍රියාමාර්ග ඔහුගේ ස්වාධීනත්වයට හෝ අධිකරණ ක්‍රියාදාමයේ සාධාරණත්වයට බලපෑමක් ඇති කළේද යන්න සොයා බලන ලෙස ද ඉල්ලා තිබේ.
මේ සම්බන්ධයෙන් ස්වාධීන විමර්ශනයක් පැවැත්වීම, මහජන මුදල් වැය කිරීම පිළිබඳ විගණනයක් සිදු කිරීම සහ නීතිය උල්ලංඝනය කර ඇති බව අනාවරණය වන පුද්ගලයන්ට එරෙහිව සුදුසු නීතිමය ක්‍රියාමාර්ග ගැනීම රණවක මහතාගේ නීතිඥ කණ්ඩායම ඉල්ලා ඇත.
නීතියේ ආධිපත්‍යය ආරක්ෂා කිරීම, මහජන මුදල් භාවිතය සම්බන්ධයෙන් වගවීම තහවුරු කිරීම සහ අධිකරණ ක්‍රියාදාමයේ ස්වාධීනත්වය රැකගැනීමේ වැදගත්කම ද පැමිණිල්ලෙන් අවධාරණය කර තිබේ.
