මෙරට ප්‍රමුඛ පෙළේ ව්‍යාපාරිකයන් කිහිප දෙනෙකු දේශපාලනයට පැමිණීමට ගත් තීරණය සාධනීය පියවරක් බව සමගි ජන බලවේගයේ පාර්ලිමේන්තු මන්ත්‍රීවරයෙක් පැවසීය.
“ප්‍රමුඛ පෙළේ ව්‍යාපාරිකයන් දේශපාලනයට එන විට බදු ගෙවීමට සිදුවේවි. ඔවුන් තම මුදල් සාමාන්‍ය ජනතාවගේ අභිවෘද්ධිය සඳහා වැය කරනු ඇත. ඒ නිසා මෙරට ප්‍රමුඛ පෙළේ ව්‍යාපාරිකයන් කිහිප දෙනෙකු දේශපාලනයට පැමිණීමට ගත් තීරණය සාධනීය පියවරක් යැයි සමගි ජන බලවේගයේ පාර්ලිමේන්තු මන්ත්‍රී හර්ෂණ රාජකරුණා මාධ්‍යවේදීන් හමුවේ පැවසීය.
මේ අතර, ආණ්ඩුක්‍රම ව්‍යවස්ථාව සංශෝධනය කර විධායක ජනාධිපති ක්‍රමය අහෝසි කිරීමට රජය ගෙන ඇති ක්‍රියාමාර්ගය විවේචනය කළ මන්ත්‍රීවරයා කියා සිටියේ මෙම පියවරේ සැඟවුණු න්‍යාය පත්‍රය ජනාධිපතිවරණය පවා නොපැවැත්වීම බවයි.
“ආණ්ඩුව මේ වන විටත් පළාත් පාලන මැතිවරණ, පළාත් සභා මැතිවරණ කල් දමා ඇති අතර දැන් මැතිවරණ ක්‍රම සහ ආණ්ඩුක්‍රම ව්‍යවස්ථාව සංශෝධනය කිරීම හරහා මහ මැතිවරණ සහ ජනාධිපති මැතිවරණ ද කල් දැමීමට උත්සාහ කරමින් සිටින බව ඔහු වැඩිදුරටත් පැවසීය.
