වරායේ ඇති වී තිබූ තදබදයත් සමග පරීක්ෂාවකින් තොරව පිටතට යැවූ බහාලුම්වල යම් නීති විරෝධී ද්‍රව්‍යයක් මෙරටට රැගෙන විත් තිබුණොත් එහි වගකීම රජයක් ලෙස අපි භාර ගන්නවා යැයි වරාය සහ සිවිල් ගුවන් සේවා නියෝජ්‍ය අමාත්‍ය ජනිත කොඩිතුවක්කු මහතා පවසයි.
ඒ මහතා මෙම අදහස් පළ කළේ හෝමාගම බස් ඩිපෝවේ සිදු කළ නිරීක්ෂණ චාරිකාවකින් පසුව මාධ්‍ය අමතමිනි.
එහිදී වැඩිදුරටත් අදහස් දැක්වූ නියෝජ්‍ය අමාත්‍ය ජනිත කොඩිතුවක්කු මහතා මෙසේද කීය.
අපේ වරායට දිනකට එන බහාලුම් වලින් 80% ක් පමණ නැවත ප්‍රතිඅපනයනය වෙනවා. ආනයනය වන බහාලුම් දෙදහසක් පමණ දැන් දිනකට ලැබෙමින් පවතිනවා. වරාය වර්තමානයට ගැලපෙන පරිදි සංවර්ධනය කර නොතිබීම එයට ගැටලුවක්. එහි තිබූ තදබදය ඉවත් කිරීම සඳහා ග්‍රීන් චැනල් එක ඔස්සේ පරීක්ෂාවකින් තොරව බහාලුම් 373 ක් පිටතට යවා තිබෙන බව සත්‍යයක්.
එලෙස පරීක්ෂාවකින් තොරව බහාලුම් පිටකිරීම් සම්බන්ධයෙන් අපරාධ පරීක්‍ෂණ දෙපාර්තමේන්තුවට මේ වනවිට පැමිණිල්ලක් දාලා තියෙනවා. ඒ වගේම අභ්‍යන්තර පරීක්ෂණයක් ද සිදු කෙරෙනවා.
මෙරටට පැමිණි නැව් 27 ක ප්‍රමාණයක් නැවත හැරී ගොස් තිබෙන බව අපිට කිව්වේ නැව් ඒජන්තවරු විසින්මයි. නැව් අපේ සීමාවට ආවට ආයේ හැරලා යන්නත් පුළුවන්. අනෙක් රටට ලඟා වෙන්න තියෙන වෙලාව අනුව අපේ රටේ තියෙන තදබදය නිසාත් නැවක් හැරිලා යන්න පුළුවන් ඒ පිළිබඳව දත්ත තියෙන්නේ නැව් නියෝජිතයන් ගාව පමණයි. ඉතින් අපිට එයාලව විශ්වාස කරන්න වෙනවා. නැව් වරාය ඇතුලට ඇවිල්ල හැරිලා ගියාද පිටතින් හැරිලා ගියාද කියන ප්‍රශ්නය තමයි තියෙන්නේ. ඇත්තටම අපේ වරාය දැන් කාර්යබහුලයි. ඒකත් රේගුවේ ප්‍රශ්නේ වගේ තමා. 2024 ඉවර වෙන්න තිබුන නැගෙනහිර ජැටිය අපි එනකොට තිබුනේ 2027 ඉවර කරන්නයි. මේ අවුරුද්දේම ඉවර කරගන්න අපි දැන් උත්සාහ කරනවා.
