Thursday, 19 November 2026

ශ්‍රී ලංකාවේ උණුසුම් පුවත් විමසුම

දකුණු ඉන්දියාවට හොර රහසේ ගෙන යාමට සූදානම් කළ රත්‍රන් කිලෝ 4 කට වැඩි තොගයක් නාවික හමුදා දැලේ

බෙදාගන්න
XWhatsAppTelegramඅදහස්

දකුණු ඉන්දියාවට මුහුදු මාර්ගයෙන් නීතිවිරෝධී ලෙස රැගෙන යාමට සූදානම් කර තිබූ බවට සැක කෙරෙන රත්‍රන් කිලෝග්‍රෑම් හතරකට අධික තොගයක් මන්නාරමේ සහ පුත්තලමේ සිදු කළ වෙනම මෙහෙයුම් දෙකකදී සැකකරුවන් සිව්දෙනෙකු සමඟ අත්අඩංගුවට ගැනීමට ශ්‍රී ලංකා නාවික හමුදාව සමත්ව තිබේ.

නාවික හමුදාව සඳහන් කළේ, අඟහරුවාදා (නොවැම්බර් 17) තලෙයිමන්නාරම පේසාලේ සහ පුත්තලම උච්චමුනේ මුහුදු ප්‍රදේශවල මෙම මෙහෙයුම් සිදු කළ බවත්, එහිදී රත්‍රන් කිලෝග්‍රෑම් 4.435 ක් පමණ සහ ඩිංගි බෝට්ටු දෙකක් අත්අඩංගුවට ගත් බවත්ය.

පේසාලේ වැලි ගෝනියකින් රත්‍රන් කිලෝ 1.410 ක්

පළමු මෙහෙයුමේදී උතුරු මැද නාවික විධානයට අනුයුක්ත නාවික පුද්ගලයින් විසින් තලෙයිමන්නාරම, පේසාලේ මුහුදු ප්‍රදේශයේදී සැකකටයුතු ඩිංගි බෝට්ටුවක් පරීක්ෂාවට ලක් කර ඇත. එම යාත්‍රාව සෝදිසි කිරීමේදී වැලි පිරවූ ගෝනියක් තුළ සඟවා තිබූ රත්‍රන් කිලෝග්‍රෑම් 1.410 ක් පමණ සොයාගෙන තිබේ.

සිද්ධිය සම්බන්ධයෙන් පේසාලේ ප්‍රදේශයේම පදිංචි වයස අවුරුදු 25 සහ 28 යන වයස්වල පසුවන සැකකරුවන් දෙදෙනෙකු අත්අඩංගුවට ගත් අතර, ඉදිරි නීතිමය කටයුතු සඳහා සැකකරුවන්, රත්‍රන් තොගය සහ ඩිංගි බෝට්ටුව යාපනය, කන්කසන්තුරේ නියෝජ්‍ය රේගු අධ්‍යක්ෂ කාර්යාලය වෙත භාර දී ඇත.

උච්චමුනේ ඉන්ධන බූලියකින් රත්‍රන් කිලෝ 3.25 ක්

වයඹ නාවික විධානය විසින් පුත්තලම, උච්චමුනේ මුහුදු ප්‍රදේශයේ අඟහරුවාදා රාත්‍රියේ සිදු කළ තවත් මෙහෙයුමකදී සැකකටයුතු ඩිංගි බෝට්ටුවක් නාවික හමුදා භාරයට ගෙන තිබේ. එම යාත්‍රාව පරීක්ෂා කිරීමේදී ඉන්ධන බූලියක් තුළ සඟවා තිබූ රත්‍රන් කිලෝග්‍රෑම් 3.25 ක් පමණ සොයා ගැනීමට හැකි විය.

එම වැටලීමට අදාළව කල්පිටිය ප්‍රදේශයේ පදිංචි වයස අවුරුදු 40 සහ 50 යන වයස්වල පසුවන සැකකරුවන් දෙදෙනෙකු අත්අඩංගුවට ගෙන ඇත. වැඩිදුර විමර්ශන සඳහා සැකකරුවන්, රත්‍රන් තොගය සහ ඩිංගි බෝට්ටුව කටුනායක රේගු නිවාරණ කාර්යාලය වෙත භාර දුන් බවත්, අත්අඩංගුවට ගත් රත්‍රන් තොග දකුණු ඉන්දියාවට මුහුදු මාර්ගයෙන් ජාවාරම් කිරීමට සූදානම් කර තිබූ බවට සැක කෙරෙන බවත් නාවික හමුදාව වැඩිදුරටත් පවසයි.

ඔබේ අදහස