ඝාතනයකින් පසු සැකකරු මහවැලි ගඟට පනින්න යයි

කටුගස්තොට, මැණික්කුඹුර පටුමාවත ප්‍රදේශයේ තෙමහල්  නිවසක ආරක්ෂාවට යොදවා සිටි පෞද්ගලික ආරක්ෂකයෙක් එම නිවෙස්හිමියාට තියුණු ආයුධයකින් පහරදී ඝාතනය කර තිබේ.

එලෙස මියගොස් ඇත්තේ 56 හැවිරිදි එක්දරු පියෙකි.

ඊයේ (16) අළුයම 5ට පමණ නිවෙස්හිමියාව නිවසින් එළියට කැඳවා ඝාතනය සිදුකර ඇති බව පොලීසිය පැවසීය.

අනතුරුව තියුණු ආයුධය ද රැගෙන ඝාතනයා මහවැලි ගඟට පැනීමට උත්සාහා කිරීමේදී ප්‍රදේශවාසීන් ඔහුව අල්ලාගෙන පොලීසිය භාරදී තිබුණි.

මියගිය පුද්ගලයාගේ බිරිඳ මැදපෙරදිග රැකියාවක නිරතව සිටින අතර මියගිය පුද්ගලයා එම නිවසේ තනිව වාසයකරන ඇති බව පොලීසිය පැවසීය.

ඝාතනයට හේතුව මෙතෙක් අනාවරණය වී නොමැත.

මේ අතර රත්මලාන ඥානේන්ද්‍රාරාම පාරේ පසුගියදා පුද්ගලයෙකුට වෙඩිතබා බරපතළ තුවාල සිදුකිරීමේ සිද්ධියට සම්බන්ධ පිස්තෝලයක්, උණ්ඩ සහ අත් මාංචු සමගින් පුද්ගලයන් දෙදෙනෙක් අත්අඩංගුවට ගෙන තිබේ.

මීගොඩ ප්‍රදේශයේදී ඔවුන් අත්අඩංගුවට ගෙන තිබුණේ පොලිස් විශේෂ කාර්ය බළකාය නිලධාරීන් විසිනි.

සැකකරුවන්ගෙන් සිදුකළ ප්‍රශ්න කිරීමේදී අනාවරණය වී ඇත්තේ ඩුබාහි සිටින සංවිධානාත්මක අපරාධ කල්ලි සාමාජිකයකු වන ප්‍රියන්ත නැමැත්තාගේ උපදෙස් මත එම වෙඩිතැබීම සිදුකර ඇති බවය.

වෙඩිතැබීම සිදුකළ එක් සැකකරුවෙකු රාජ්‍ය නොවන සංවිධානයක විමර්ශන නිලධාරියෙකු ලෙස සේවය කර ඇති අතර අනෙක් සැකකරු යුද හමුදාවෙන් පළාගිය පුද්ගලයෙකි.

Leave a Reply

Your email address will not be published. Required fields are marked *