පාදුක්ක වටරැක හල්බරාව ප්‍රදේශයේ මත්ද්‍රව්‍ය බෙදා හැරීමේ මධ්‍යස්ථානයක් වටලා රුපියල් කෝටි එකසිය පණහකට වැඩි වටිනාකමින් යුත් මත්ද්‍රව්‍ය තොගයක් අත් අඩංගුවට ගැනීමට පොලිස් විශේෂ කාර්ය බළකාය සමත්ව ඇත.
අත් අඩංගුවට ගත් මත්ද්‍රව්‍ය අතර අයිස් මත්ද්‍රව්‍ය කිලෝ 42 ග්‍රෑම් 890 ක් සහ හෙරොයින් මත්කුඩු කිලෝ 29 ග්‍රෑම් 750 ක ප්‍රමාණයක් හමු වී ඇති අතර එම මත්ද්‍රව්‍ය සමගින් බොරැල්ල සහ තලවතු ගොඩ ප්‍රදේශයේ පදිංචිකරුවන් වන වයස අවුරුදු 41 සහ 37 පුද්ගලයන් දෙදෙනකු අත්අඩංගුවට ගෙන ඇත.
අදාල මධ්‍යස්ථානයේ සිට මත්ද්‍රව්‍ය බෙදාහැරීම සිදු කළ ලොරි රථයක විශේෂයෙන් සකස් කළ කුටියක තිබී මෙම මත්ද්‍රව්‍ය තොගය හමු වී ඇති අතර එම ලොරි රථයේ පොල් විකිණීමට රැගෙන යන ආකාරයෙන් මෙම මත්ද්‍රව්‍ය බෙදාහැරීම සිදුකළ ඇති බවට අනාවරණය වූ බවද වැඩ බලන පොලිස්පති ප්‍රියන්ත වීරසූරිය මහතා පවසයි.
