උතුරු හා උතුරු මැද පාසල්වල ඉංග්රීසි අධ්යාපනයට ඇමරිකානු සාම බලකායේ 34 ක්

උතුරු සහ උතුරු මැද පළාත්වල පාසල්වල ඉංග්රීසි භාෂා අධ්යාපනය ශක්තිමත් කිරීම සඳහා ඇමරිකානු සාම බලකායේ (Peace Corps) ස්වේච්ඡා සේවකයන් 34 දෙනෙකුගෙන් යුත් කණ්ඩායමක් ශ්රී ලංකාවේ දෙවසරක සේවා කාලයක් ආරම්භ කර තිබේ.
කොළඹ ඇමරිකානු තානාපති කාර්යාලය සඳහන් කරන පරිදි, 2018 වසරේදී මෙම වැඩසටහන යළි ආරම්භ කිරීමෙන් පසු ශ්රී ලංකාවට එවන ලද විශාලතම තනි ස්වේච්ඡා සේවක කණ්ඩායම මෙය වේ.
බුලත්සිංහල, කොටපන්විල ප්රදේශයේදී අඟහරුවාදා (නොවැම්බර් 17) පැවති උත්සවයකදී, ශ්රී ලංකාවේ ඇමරිකානු තානාපති එරික් මේයර් (Eric Meyer) මහතා ඉදිරියේ මෙම ස්වේච්ඡා සේවකයින් සාම බලකායේ සේවා ප්රතිඥාව ලබා දුන්හ. විදේශ කටයුතු, විදේශ රැකියා සහ සංචාරක නියෝජ්ය අමාත්ය අරුන් හේමචන්ද්ර මහතා සහ අධ්යාපන අමාත්යාංශයේ ජ්යෙෂ්ඨ නිලධාරීහු ද මෙම අවස්ථාවට එක්ව සිටියහ.
පන්ති කාමර ඉගැන්වීම් සහ සංස්කෘතික හුවමාරුව
සිසුන්ගේ ඉංග්රීසි භාෂා සන්නිවේදන කුසලතා වැඩිදියුණු කිරීම අරමුණු කරගත් පන්ති කාමර සම-ඉගැන්වීම් (Co-teaching), ගුරු පුහුණු වැඩමුළු සහ අනෙකුත් අධ්යාපනික ක්රියාකාරකම් හරහා මෙම ස්වේච්ඡා සේවකයන් ශ්රී ලාංකික ගුරුවරුන් සමඟ එක්ව කටයුතු කරනු ඇත.
දෙරට අතර සබඳතා ශක්තිමත් කර ගනිමින් දේශීය සම්ප්රදායන් හා සංස්කෘතිය අත්විඳීමට අවස්ථාව සලසමින් ඔවුන් ශ්රී ලාංකික සත්කාරක පවුල් සමඟ ජීවත් වීමට ද නියමිතය.
උත්සවය අමතමින් තානාපති මේයර් මහතා ප්රකාශ කළේ මෙම ස්වේච්ඡා සේවකයන් තමන් සේවය කරන ප්රජාවන්හි කොටසක් බවට පත්වෙමින් පන්ති කාමර ඉගැන්වීම්වලින් ඔබ්බට ගිය දායකත්වයක් ලබාදෙනු ඇති බවයි.
“ඉදිරි වසර දෙක තුළ ඔවුන් ඉගැන්වීමට වඩා වැඩි යමක් කරනු ඇත. ඔවුන් අසල්වැසියන්, මිතුරන් සහ තම නිවෙස්වලට ඔවුන්ව පිළිගන්නා පවුල්වල සාමාජිකයන් බවට පත්වනු ඇත,” යැයි ඔහු පැවසීය.
අධ්යාපන අමාත්යාංශයේ අධ්යාපන නියෝජ්ය අධ්යක්ෂ සහ ශ්රී ලංකා සාම බලකා සම්බන්ධීකරණ නිලධාරී ආනන්ද අරසු මහතා සඳහන් කළේ, ඉංග්රීසි අධ්යාපනය වැඩිදියුණු කිරීමේදී මෙම ස්වේච්ඡා සේවකයින් වැදගත් කාර්යභාරයක් ඉටු කරනු ඇති බවයි. දේශීය ගුරුවරුන් සමඟ ඔවුන් දක්වන සහයෝගීතාව සංස්කෘතික හුවමාරුව සහ අන්යෝන්ය අවබෝධය ප්රවර්ධනය කරන අතරම සිසුන්ට සිය ඉංග්රීසි සන්නිවේදන කුසලතා වර්ධනය කර ගැනීමට අවස්ථාව සලසා දෙනු ඇතැයි ඔහු පැවසීය.
සිංහල හා දෙමළ පුහුණුව සහ වැඩසටහන් ඉතිහාසය
ප්රතිඥා දීමට පෙර මෙම ස්වේච්ඡා සේවකයින් 34 දෙනා සිංහල සහ දෙමළ භාෂා, ශ්රී ලාංකික සංස්කෘතිය සහ ඉගැන්වීමේ ක්රමවේදයන් පිළිබඳව සති නවයක දැඩි පුහුණුවක් සම්පූර්ණ කර ඇත. මෙම නව කණ්ඩායමත් සමඟ දැනට ශ්රී ලංකාවේ සේවය කරන මුළු ඇමරිකානු සාම බලකා ස්වේච්ඡා සේවකයින් සංඛ්යාව 57 දක්වා ඉහළ ගොස් ඇති බව ඇමරිකානු තානාපති කාර්යාලය සඳහන් කරයි.
ශ්රී ලංකාවේ සාම බලකා මෙහෙයුම් ප්රථම වරට 1962 වසරේදී ආරම්භ වූ අතර, ගෙවුණු වසර ගණනාව පුරා අධ්යාපනය, සෞඛ්ය, කෘෂිකර්මාන්තය සහ ප්රජා සංවර්ධනය යන ක්ෂේත්රවල ඇමරිකානු ස්වේච්ඡා සේවකයින් 600 කට ආසන්න පිරිසක් සේවය කර තිබේ. 1998 වසරේදී මෙහෙයුම් අත්හිටුවීමෙන් අනතුරුව, 2018 වසරේදී ශ්රී ලංකා අධ්යාපන අමාත්යාංශය සමඟ එක්ව මෙම වැඩසටහන යළි ආරම්භ කෙරිණි.




