පල්ලෙකැලේ ජාත්‍යන්තර ක්‍රිකට් ක්‍රීඩාංගණයේ පැවැති “ලෙජන්ට් ට්‍රොපි 2024” ක්‍රිකට් තරගාවලියේදී තරග පාවා දීමට ක්‍රිකට් ක්‍රීඩකයින්ට බලපෑම් කළේ යැයි කියන ඉන්දීය ක්‍රිකට් කළමනාකාරවරුන් දෙදෙනකුට පැනවූ මෙරටින් පිටවීමේ තහනම් නියෝගය ජුනි මස 13 වැනි දින දක්වා දීර්ඝ කිරීමට කොළඹ ප්‍රධාන මහේස්ත්‍රාත් ප්‍රසන්න අල්විස් මහතා නියෝග කළේය.
තරග පාවාදීම සම්බන්ධ විමර්ශන තවදුරටත් සිදු කිරීමට කාළය අවශ්‍ය බැවින් විදෙස් ගමන් තහනම මාස තුනකට දීර්ඝ කරන ලෙසට ක්‍රීඩා වලට සම්බන්ධ වැරදි වැළැක්වීමේ විශේෂ විමර්ශන ඒකකයේ ස්ථානාධිපතිවරයා කළ ඉල්ලීමක් සලකා බැලීමෙන් පසුව මහේස්ත්‍රාත්වරයා මෙම නියෝගය නිකුත් කළේය.
කෑන්ඩි සෑම් ආමි කණ්ඩායමේ කළමනාකාර යෝනී පටෙල්ට සහ පංජාබ් රෝල් කණ්ඩායමේ පැචලෝඩියා ආකාශ්ට මාර්තු මස 14 වැනි දින පැනවූ මෙම තහනම මෙසේ තවදුරටත් දීර්ඝ කිරීමට නියෝග කෙරිණි.
සැකකාර යෝගී පටෙල් පසුගිය 26 වැනි දින නීතිඥවරයකු මාර්ගයෙන් අධිකරණයට කරුණු දක්වමින් තමන්ට පනවා ඇති විදෙස් ගමන් තහනම ඉවත් කරන ලෙස ඉල්ලීමක් ඉදිරිපත් කළ අතර එම ඉල්ලීම ප්‍රධාන මහේස්ත්‍රාත්වරයා ප්‍රතික්ෂේප කළේය.
තරග පාවාදීමේ සිද්ධිය සම්බන්ධයෙන් සැකකරුවන් ලෙස නම් කර , තවදුරටත් විමර්ශන සිදු කරන බැවින් සැකකරුවන්ගේ විදෙස් ගමන් තහනම ඉවත් කළ නොහැකි බව පෙන්වා දුන් මහේස්ත්‍රාත්වරයා සැකකරු රුපියල් ලක්ෂ පනහ බැගින් වූ ශරීර ඇප දෙකක් මත මුදා හැරීමට නියෝග කළේය.
