සඳුදා මෝටර් රථයකින් ගැටී සිදු වූ බවට සැක කෙරෙන හිතාමතා කළ ප්‍රහාරයකින් තුවාල ලැබූ ඕස්ට්‍රේලියානු ස්වාධීන පාර්ලිමේන්තු මන්ත්‍රීවරියක වන හෙලන් හේන්ස්ට එක් පාදයක් අහිමි වී ඇති බව එරට මාධ්‍ය වාර්තා කරයි.
මෙම සිදුවීමෙන් බරපතළ තුවාල ලැබූ 65 හැවිරිදි හේන්ස් මහත්මිය රාත්‍රියේ ශල්‍යකර්මයකට භාජනය කර තිබේ. එහිදී ඇයගේ එක් පාදයක් කපා ඉවත් කර ඇති බව ඕස්ට්‍රේලියානු ජාතික විකාශක ABC සහ සිඩ්නි මෝර්නින් හෙරල්ඩ් පුවත්පත අඟහරුවාදා වාර්තා කර ඇත.
වික්ටෝරියා ප්‍රාන්තයේ අගනුවර වන මෙල්බර්න් නුවරට ඊසාන දෙසින් පිහිටි වැන්ගරටා ප්‍රදේශයේ ඇයගේ මැතිවරණ කාර්යාලය ඉදිරිපිට මෙම සිදුවීම සිදුව තිබේ. ඒ සම්බන්ධයෙන් පොලිසිය සිදු කරන විමර්ශනයට ත්‍රස්ත විරෝධී විමර්ශකයන් ද එක්ව සිටිති.
ප්‍රහාරය සම්බන්ධයෙන් මෙතෙක් අනාවරණය වී ඇති කරුණු
පොලිසිය සඳහන් කළ පරිදි සුදු පැහැති ටොයෝටා වර්ගයේ SUV රථයකින් හේන්ස් මහත්මිය ගැටී තිබේ. ඇයගේ සිරුරේ පහළ කොටසට විශේෂයෙන් බරපතළ තුවාල සිදුව ඇත.
සිද්ධිය දුටු සාක්ෂිකරුවන් උපුටා දක්වමින් ABC වාර්තා කළේ, විශාල ශබ්දයක් ඇසීමෙන් පසු කාන්තාවක මෝටර් රථ දෙකක් අතර සිරවී සිටිනු තමන් දුටු බවයි.
ඕස්ට්‍රේලියානු අගමැති ඇන්තනි ඇල්බනීස් පැවසුවේ රථය පැදවූ බවට සැක කෙරෙන 43 හැවිරිදි පුද්ගලයා අත්අඩංගුවට ගෙන ඇති බවයි.
මූලික විමර්ශනවලින් පෙනී යන්නේ හේන්ස් මහත්මිය තම මෝටර් රථයේ පිටුපසින් භාණ්ඩ පැටවීමේ හෝ බෑමේ නිරතව සිටියදී සැකකරු රථය හරවාගෙන පැමිණ ඇයගේ ගැටුණු බව යැයි අගමැතිවරයා සඳහන් කළේය.
“මෙය අනතුරක් නොවේ. පෙනෙන විදිහට මෙය හිතාමතා කළ ක්‍රියාවක්,” යැයි ඔහු ABC වෙත පැවසීය.
උදව් කිරීමට දිව ආ ප්‍රදේශයේ බාබර්වරයා
හේන්ස් මහත්මියගේ කාර්යාලයට යාබදව සිය බාබර් සාප්පුව පවත්වාගෙන යන රිකී ජෙෆ්රීස්, සිද්ධියෙන් පසු රියදුරා රථයෙන් පිටතට ඇදගෙන පොලිසිය පැමිණෙන තෙක් ඔහු පාලනය කරගෙන සිටීම හේතුවෙන් බොහෝ දෙනාගේ ප්‍රශංසාවට ලක්ව තිබේ.
එම අවස්ථාවේදී සැකකරුගේ මෝටර් රථය තුළ පිහියක් තිබූ බව ද වාර්තා වේ. එවැනි අවදානම් තත්ත්වයක් හමුවේ මැදිහත් වුවද, ජෙෆ්රීස් තමන් කළ කාර්යයේ වැදගත්කම අවම කරමින් අදහස් පළ කළේය.
“ඔහු ළඟ පිහියක් තිබුණා. නමුත් ඔහු එය එළියට ගත්තේ නැහැ. ඔහුගේ හැසිරීම් ගැන මට විශ්වාසයක් තිබුණේ නැහැ. ඒ නිසා මම ඔහුගේ සාක්කුවෙන් පිහිය අරගෙන ඉවතට විසි කළා,” යැයි ඔහු පැවසීය.
පොලිසිය පැමිණෙන තෙක් තමන් සැකකරු බිම තබාගෙන සිටි බව ද ජෙෆ්රීස් සඳහන් කළේය.
“මම ඔහු මතට නැඹුරු වී සිටියා. ඔහු බිම වැටී තවදුරටත් තර්ජනයක් නොවන බව තහවුරු වූ පසු, මම ඔහු අසල සිට ඔහුට එතැනින් යා නොහැකි බව කිව්වා,” යැයි ඔහු පැවසීය.
මාධ්‍යවේදීන් සමඟ අදහස් දක්වමින් ජෙෆ්රීස් කියා සිටියේ එම අවස්ථාවේ තමන්ට මුලින්ම සිතුණේ “මට තුවාලයක් වුණොත් මගේ බිරිඳ ඒ ගැන කලකිරේවි” යන්න බවයි.
“මෙතැන සිටි අනෙක් අය මට වඩා බොහෝ දේ කළා. ප්‍රශංසාව හිමි විය යුත්තේ ඔවුන්ටයි,” යනුවෙන් ද ඔහු පැවසීය.
දේශපාලන ප්‍රචණ්ඩත්වය ඉහළ යන බවට අගමැතිගෙන් අනතුරු ඇඟවීමක්
මෙම ප්‍රහාරයට හේතුව කුමක්දැයි ප්‍රකාශ කිරීමට තවමත් කල් වැඩි බව අගමැති ඇල්බනීස් සඳහන් කළේය. එහෙත් මෑත කාලයේ දේශපාලන ප්‍රචණ්ඩත්වය ඉහළ යාම පිළිබඳව ඔහු අවධානය යොමු කළේය.
“මෑත කාලයේ තත්ත්වය වඩාත් උණුසුම් වී තිබෙනවා. ඒ පිළිබඳ මගේ කනස්සල්ල මාධ්‍ය ක්ෂේත්‍රයේ පුද්ගලයන්ටත් මම ප්‍රකාශ කර තිබෙනවා,” යැයි ඔහු පැවසීය.
මෙම සිදුවීම සම්බන්ධයෙන් වැන්ගරටා පිහිටි වික්ටෝරියා ප්‍රාන්තයේ ප්‍රධාන අමාත්‍ය බෙන් කැරොල් ද සිය කම්පනය පළ කළේය.
“මෙය වැන්ගරටා ප්‍රජාවට සහ හෙලන් නියෝජනය කරන සියලු දෙනාට කෙතරම් විනාශකාරී බලපෑමක් ඇති කරනු ඇත්දැයි මම දන්නවා,” යැයි ඔහු සඳහන් කළේය.
වෙනම මාධ්‍ය හමුවකදී අගමැති ඇල්බනීස් පැවසුවේ හේන්ස් මහත්මියට සම්පූර්ණ සුවය ලැබෙන ලෙස සියලු දෙනා ප්‍රාර්ථනා කරමින් සිටින බවයි.
මෙම සිදුවීම හිතාමතා කළ ප්‍රහාරයක්ද යන්න තවමත් නිශ්චිතව තහවුරු කර නොමැත. කෙසේ වෙතත්, මෑත වසරවලදී ඕස්ට්‍රේලියාවේ මෙන්ම වෙනත් රටවල ද පාර්ලිමේන්තු මන්ත්‍රීවරුන් සහ ජ්‍යෙෂ්ඨ රාජ්‍ය නිලධාරීන් ඉලක්ක කර ගනිමින් තර්ජන සහ හිරිහැර කිරීමේ සිදුවීම් ඉහළ ගොස් තිබේ.
හේන්ස් මහත්මිය 2019 වසරේදී පාර්ලිමේන්තුවට පිවිසීමට පෙර හෙදියක සහ වින්නඹු මාතාවක ලෙස සේවය කර ඇත. දේශගුණික විපර්යාසවලට එරෙහිව වඩාත් ශක්තිමත් ක්‍රියාමාර්ග ගත යුතු බවට පෙනී සිටීම සම්බන්ධයෙන් ද ඇය ප්‍රසිද්ධියක් උසුලයි.
