පාස්කු ඉරිදා ත්රස්ත ප්රහාරය සම්බන්ධයෙන් හිටපු බුද්ධි අංශ ප්රධානී සුරේෂ් සලෙයි මහතාට ගත හැකි වඩාත් සුදුසුම පියවර වන්නේ ඔහු සතුව ඇති සියලු තොරතුරු හෙළි කර දැනට කරගෙන යන පරීක්ෂණවලට සහාය වීම බව කැබිනට් ප්රකාශක, අමාත්ය නලින්ද ජයතිස්ස මහතා පැවසීය.
ඊයේ (16) පැවති කැබිනට් තීරණ දැනුම් දීමේ සතිපතා මාධ්ය හමුවට එක්වෙමින් අමාත්යවරයා කියා සිටියේ හිටපු බුද්ධි අංශ සහ හමුදා නිලධාරියෙකු ලෙස තමන් දන්නා තොරතුරු වසන් කිරීමේ වටිනාකමක් නොමැති බවයි.
“මොනවා වුණත් බුද්ධි අංශ සහ හමුදා නිලධාරියෙක් විදියට සුරේෂ් සලෙයිට කරන්න පුළුවන් හොඳම දේ තමයි පාස්කු ඉරිදා ප්රහාරය ගැන ඔහු දන්නා දේ හෙළිදරව් කිරීම සහ ආරක්ෂක අංශවලට සහය දීම” ඔහු පැවසීය.
උත්සාහය යොමු කළ යුත්තේ විමර්ශකයින් වෙනස් කිරීමට නොව අපරාධ පරීක්ෂණ දෙපාර්තමේන්තුව සමඟ සහයෝගයෙන් කටයුතු කිරීමට සහ අදාළ දත්ත සැපයීමට බව ද ඔහු අවධාරණය කළේය.
සලේ රඳවා තබා ගැනීම පිළිබඳව අදහස් දක්වමින් අමාත්යවරයා කියා සිටියේ විශේෂ සිරමැදිරියක් හෝ වරප්රසාද ලබා නොදී රැඳවුම් නියෝග යටතේ රැඳවියන් සඳහා භාවිත කෙරෙන සම්මත ක්රියා පටිපාටි යටතේ ඔහු රඳවා සිටින බවයි.
අවශ්ය සියලුම වෛද්ය සහ මානුෂීය සත්කාර සහතික කරමින් සිටින අතර බලධාරීන් ඔහුට අවශ්ය පෝෂණය දිගටම ලබා දෙන අතර පවුලේ සාමාජිකයින්ට පැමිණ ආහාර ලබා දීමට ඉඩ ලබා දෙන බව ඔහු පැවසීය. අවශ්ය වූ විට ප්රමාදයකින් තොරව වෛද්ය ප්රතිකාර ලබාදී ඇති බවද ඔහු සඳහන් කළේය.
